2009年11月22日 星期日

北台灣tshit-thô四暝五工 第三工:Truku[太魯閣]


Buluowan七月時的透早,恬靜涼爽,除了gâu早的鳥仔聲佮散步聲,空氣是恬--ê,光影嘛是恬靜--ê佇山路散步看花草樹木,嘛是一種享受,散步轉來tiōtiàm戇神椅等待食早起。

今仔日目標是sakadang[沙卡噹]佮花蓮,9點出發,順中部橫貫公路一直駛向東爿,Tiat--è刁工經由太魯閣大橋khau倒轉來,nǹg過磅空tiōsakadang步道,磅空前是sakadang大橋,步道tiō佇橋跤,這是台電為著開發立霧溪水力發電計劃所開設的道路,過去叫做神秘谷步道,這馬已經改倒轉來Taruko的原名sakadang溪邊有1段是石頭山壁,用炸藥共挖1ㄈ形磅空,佇橋頂看人佇遐行振動,像鳥鼠仔鑽孔--leh,有影心適

翕相錄影,囡仔跤無輸大人,kan-nā Tsîng-tsîng 需要人抱,tshun--ê hit 4个,兩人1 kânn,手牽手,講話,毋知leh講啥物貨。看對面山壁,袂少的大理石,花紋變化萬千,比九曲洞--的,有khah媠無khah䆀,看溪底,溪水清kah會得看著石頭仔,毋但清,色水閣變化多端,透明的光影透lām水色、孔色、青lin色、紅幻色、金黃色做一夥,別所在猶毋捌看過--koh,聽講是溪水中的微酸溶解大理岩中碳酸鈣成分所造成。大約行欲2公里,揣著一个會當落去溪底的所在,水無深,清kah石頭仔看現現,有人抾石頭,有人蹽水耍,代起先囡仔猶躊躇毋肯落水,慢慢仔siânn勻勻仔騙tiōkah歡喜but-but,無想欲起來。

回程時陣,路邊問1Truku少年人,原來遮是怹的保留區,怹的族名叫Ta-lu-kuh 毋是Tha-lu-koh抑是Thài-lóo-kok,因為用漢字寫抑是用英語呼音,chiah-ē走音去。

離開sakadang直接駛花蓮市,遮tiō是後山,突然間1陣大雨沃kah路澹sip-sippān-phue會影響著路程,無偌久雨過天清,大蕊大蕊的白雲,像棉仔毬、像棉仔糖,膨giâ-giâ狗仔毛(moo)兔仔毛(mn̂g),浮佇水藍色的天篷下,心情隨時活跳想欲飛。已經傷過晝,囡仔已經無耐性,趕緊揣1間「麥當勞」,食美國割包,這是少年、囡仔上合意,老歲仔嘛著綴leh享受,消磨2點鐘,腹肚飽眠嘛足,起行閣來去耍。

「麥當勞」tshiân傷久,所以跳過預定第一站--慶修院,直接進入花東縱谷去揣「壽豐鄉文史館」,參觀了後淡薄仔失望,看起來不過是一个社區的活動中心--niâ,無啥thang看,花蓮縣政府共伊列入景點,毋知有啥物特別的意義?

朋友捌佇東華大學教冊,聽講校園真媠,佇大門換證了後tiō會使得入去,閣無收錢。學校規劃袂䆀,建築物tsiânn媠,有1堀人工水池,加添校園媠款面貌,水池內若飼幾隻仔天鵝、鴛鴦水鴨,毋知欲加偌仔有氣氛--leh,上欠點--ê tiō是樹仔猶細叢,佮曠闊的校園實在無kah-phah。徛佇校園上趣味--ê tiō是看天頂的雲彩暗霞,「夕陽無限好,只是近黃昏。」有較悲觀,共改做「夕陽無限好,因為是黃昏。」抑是「暗霞tsin-tsiânn媠,因為是欲暗仔時。」較袂予老人感覺稀微。

盈暗的旅館佇市區內,俗閣清氣,閣有網路,可惜大間房間佇地下室,淡薄仔濕氣,安搭好勢tiō出門揣食,Tiat--è有計畫,知影佗位有好料理,揣出名的點心,一位食一寡,享受名產。食飽順紲買1粒雞卵糕佮1盒麻糬,tsah轉來旅館食點心。

洗浴了,佮囡仔做夥看電視,講著看電視,囡仔逐个恬tsut-tsut,看kah喙仔開開開,9點外,新婦A-Jû1隻椅頭仔,囥雞卵糕,插蠟燭,講欲共大查某囝的後生A-Tāu做生日,A-Tāu歡喜kah,關電火,唱生日歌,華語版、英語版、台語版攏唱一遍,A-Tāu袂曉下願,kan-ná講伊欲食雞卵糕,tiō共第一塊雞卵糕提予伊食。阿媽歡喜共伊攬牢牢,阿公無閒翕相錄影。感心的暗暝,兩頂總舖睏一家伙。

Sakadang步道:

Sakadang溪水清清 ,大理石壁像仙境,溪水色地真奧妙,黃紅青白影晶瑩。(ing)

Sakadang溪水清清 ,溪底石頭粒粒明,大理石紋變化多,台灣奇景自然成。(ing)

花蓮印象:

後山日先到,光艷污染無,藍天貼白雲,空氣袂濁濁。(o)

上媠魚肚白,日出照山宅,山林青翠翠,暗霞戴瓜笠。(eh)

[]:暗霞出現佇山尾溜,親像戴瓜笠。2009/11/22蕭平治

2009年11月19日 星期四

北台灣tshit-thô四暝五工 第二工:合歡山


早睏早精神,透早的山景清涼空氣鮮(tshinn),看真遠,廬山部落、廬山溫泉佇目睭前,山風予人淡薄仔畏寒,天頂雲真白,表示今仔日是好天。為著囡仔佮阮兩老--的,早頓雖罔簡單,猶是食真慢,囡仔白熊狗,這種狗大phiāng恬靜,雄雄看會予人驚,佮伊耍,卻是隨在人摸隨在人創治攏無要緊,無性無地,極加毋tshap--你做伊走,kài有修養。

山頂天氣變化oh料,明明拄才是好天,9點出發時陣,suah滿山雺霧,路痕澹濕,交代Tiat--è駛車著細膩,霧燈著拍開,毋通駛傷緊。踅過「青青草原,山路愈tshìngkuân,雺嘛愈來愈重,本tsiânn美麗的山景攏藏佇雺霧內,可惜--à。山路彎來斡去踅kah予人gíngín戇強欲睏--去,突然間豪光現前,炎天赤日頭,看著光艷的日頭光照著白雲,原來是踅過一粒山頭,越過一个山嶺,已經來到武嶺。武嶺標高3275公尺,是中橫公路上懸所在,視野曠闊,停車翕相看光景的人袂少,可惜便所袂使用有khah無方便。囡仔真乖,予怹食一寡點心,tiō閣撲撲趒,有講有笑。

紲落來到合歡山〈合歡山國家森林遊樂區〉,便所一流--ê、風景一流--ê、空氣一流--ê,合歡尖山tiō「合歡山莊」後壁面,會當看著奇萊山北峰、合歡群山。大囝婿、查某囝毋捌來--過,特別趣味,一直共囡仔翕相;後生、新婦特別注心hit間新開張的松雪大樓,趕緊行去瞭一下(lió-tsi̍t--è);我是共牽手講古,講斯當時是按怎佮朋友來遮peh合歡主峰、石門山、東峰佮北峰,是按怎發生高山症?講kah喙角全波,牽手講:「十个老人九个當原初,果然規欉好好----無錯。」因為tshiân傷久,登百岳之一石門山的計畫自按呢取消,Tiat--ê感覺真可惜。

時間已經過晝,腹肚kū-kūleh大腸告小腸,tiō佇下一站大禹嶺食晝,大禹嶺是主線佮霧社支線的分叉路站,霧社駛車來到遮,suah一時東西南北分袂清,有gông山的感覺。食飽起程,路途遙遠,趕到天祥歇睏放尿,無時間thang tshit-thô,當經過路邊磅空口時,Tiat--è紹介講:「倒手爿磅空入去tiō是白楊步道,去過的人攏呵咾真媠,以後tsiah閣來。」

5年前參加賴和台語文學營捌入去過一擺,有影儹,親像世外桃源。」

Tiat--è,車駛較慢--咧,tsit段坑溝仔風景真媠!」

「爸!咱欲頭前磅空口停車。」無偌久tiō佇路邊停車場停車。

原來是按呢--òo,倒爿磅空,正爿是九曲洞舊路,是國際觀光客上合意的路段,因為時常會落石頭造成危險,這馬禁止行車,kan-nā開放遊客步輦欣賞,2公里的大理石峽谷來回著一點鐘久,大人囡仔攏趣味十足,雖然有關單位1人分1頂安全帽,也是會感覺驚驚,不時著斟酌囡仔的行動。水是大自然「工夫慢」的雕刻師傅,經過千年萬年的沖割si-ia-geh,才有今仔日天然美景,天然--ê上媠,大自然上帝的造作才是藝術,厝內的收集beh thài-thó會比得,總講一句,行向大自然tō-tio̍h--lah

時間真正無早,趕到布洛灣山月村[Buluowan]已經將近6點。

Buluowan的暗暝:

Taruko[太魯閣族]族語Buluowan,是「坑谷tân雷聲的所在」回音的意思,早前是Taruko部落的所在地,是一個tshē-o-á地形,四箍輪轉攏是山,kan-nā tshun一條坑溝仔是氣流的出入喙,毋才佇遮若大聲喝咻,tō ē有山壁的應聲。

來到Buluowan,旅館交代7點~9點食暗,一行十幾名tshuā 5个囡仔,行李一大堆,先揣房間安搭要緊,房間是木造--ê,外觀kài媠,除了浴間、便所、衫仔櫥以外,是一間大總舖排8tha-tha-mih大的膨床,囡仔看著tiō隨時滾地龍--起來,小歇睏了後,趁食飯前猶半點鐘久時間,tiō店厝前大遍草埔廣場散步,囡仔耍kah tsiânn歡喜,蹤來蹤去、踅圓箍仔、jiok蝶仔飛、看花草、聽鳥仔聲,攏tsiânn好玄稀奇,笑聲連連,俗語講「1个囡仔較鬧熱過3个大人」,佇Buluowan是「5个囡仔帶動遊客厝邊隔壁」,遊客互相hap仙交換tshit-thô心得。

暗頓tsiânn phong-phài,菜色袂少,tshinn閣清氣,1111坩,隨在人合意,做你共挾做你共khat1家伙仔圍2桌,少年--ê著伺候囡仔,老歲仔tiō家己揀合意的口味,tsit頓「風味餐」價數無俗,會當食巧(khá) 嘛會當食飽,1項共挾一屑--à,逐項攏共食,較合意--ê有現烘--ê的山豬肉,佮山芹菜、香圓瓜仔鬚、過貓蔬仔這款口味的料理。我特別捾2罐黍仔酒[小米酒],少年--ê 13小杯tiō無閣thîntshun-ê攏是我這个老--的總貿,tsit-mái的少年人實在會呵咾--tsit,無像我tse--的,食好料--ê無酒無算phong-phài。飯後1杯咖啡已經是慣勢,pún-tsiânn想欲閣紲--1杯,牽手擋牢咧才無閣添。

9點開始有暗會,店內的員工總動員,有人唱歌、有人彈琴、有人跳舞,演員無濟卻是搬kah tsiânn認真熱情,無冷場,觀眾嘛看kah tsiânn注神,予怹袂少的噗仔聲。其中布洛灣山月村村長(旅館頭家)gâu講古,講飛鼠的笑話、講拍獵的禁忌,講Taruko人的戇直,伊講砛簷跤囥hit幾隻椅頭仔叫做戇神椅[發呆椅],怹Taruko人傷閒的時陣,攏會坐店椅仔頂戇神戇神規半工,啥物攏無愛想,啥物攏無愛做,kan-nā戇神戇神看天頂的雲,看遠遠的山,聽風leh哼歌,聽鳥仔leh講話,其實這 tiō是「放空」的人生享受,tiō是原住民lio̍k-thiòng的性格。

暗會煞,準備洗浴oonn-oonn睏,一家伙á 4口灶,睏tiàm大總舖,雖罔有較狹,但是一家大細會當kheh-kheh做一夥的和樂氣氛,才是建置幸福家庭的因子,泡茶開講,講今仔日的歡喜,講明仔載的行程,了後隨人某囝隨人ànn,予阿媽io--過的孫,閣相爭搶欲kap阿媽睏做夥,阿媽歡喜kahhai-hai,自按呢1暝好夢到天光。

合歡山:

合歡山頂閤家歡,視野曠闊看群山,奇萊險惡佇眼前,松雪樓頂可安眠。(an)

大禹嶺:

大禹嶺雙叉路,向西東勢角,往東Truku,阮霧社來,gông山花kô-kô

來到大禹嶺,食飯較有影,此去路頭遠,餓肚會恍哧。(hiánn)

九曲洞舊路:

九曲洞內巧天工,立霧溪水流向東,大理石紋天然鑿,出名致蔭台灣人。(ang)

九曲洞內會落石,啥物時陣ioh袂著,安全第一著戴帽,遇著危險tiō可惜。(ioh) 2009/11/19蕭平治

2009年11月12日 星期四

北台灣tshit-thô四暝五工 第一工:清境農場



-->
北台灣tshit-thô四暝五工  第一工:清境農場











「爸!歇熱--a,啥物時陣你較有閒?」
Bueh創啥?」
「咱來去北台灣se̍h-se̍h--leh!」
「好--a!我來看行事曆……
7月初6起有兩禮拜ê làng縫。」
「按呢咱tio̍h決定7月初8712清境農場se̍h到合歡山、Truku、花蓮、宜蘭,tsiah tuì雪山磅空轉來新竹45工。按呢敢好?爸!」
雖罔退休已經bueh 4後生Tiat--è 真了解in pâ ê輕重學校教冊退休無m̄-tio̍hm̄-koh tshui-sak台語文ê空課並無停睏每一pái若是beh tshuātshit-thô第一考慮--ê tio̍hin pâ ê行事曆。
一家伙á 4口灶,3台車載1對老翁婆、3對少年翁某1个未嫁--ê kap 5个孫,Tiat--è駛旅行車,位較闊,兩老--ê tio̍h坐伊ê車,是計畫者,車內有衛星導航GPStio̍h予伊tshuā隊。7月初6早起9uì Tshân-tiong-ng (田中)出發,Nǹg過八卦山磅空倒斡接國道3FORMOSA高速公路,駛到霧峰系統 (霧峰交流道南旁1 km)國道6號高速公路,無guātio̍h到埔里。續落來路草彎彎斡斡來到人止關tio̍h用粗淺ê常識kap Tiat--è 開講:人止關tio̍h是古早原住民泰雅族(Ataya)、布農族(Bunun)kap平地人活動ê交界處,意思是「平地人到tsia為止」,嘛是霧社事件泰雅族首領Mona Rudao領導族人死守抗ê隘口。
這擺tuè--ê hit5个孫,細漢--ê 2歲外,大漢--ê 7歲,所以tshit-thô地點嘛是考慮重點,經過霧社無停睏直接駛到清境農場,已經12點外,治iau要緊,車隊停tiàm旅遊服務中心,tī 7-11 買一寡速食食物,簡單過一頓,方便省時間,囡á ta̍k-êkah足歡喜,khiām寡時間欣賞山景,攑目一看,山青雲白,向南閣ē-tàng看著新高山(玉山),實在有影媠,m̄-kú kā目睭àⁿ-kē看,kui山坪攏是建築物,民宿有夠濟ê濟,合法無合法超過百幾間,為著普渡眾生,按呢損斷大自然敢傷超過。
「青青草原」舊年tio̍htshuāátshit-thô,曠闊好行路,闊bóng-bóng ê草坪,人比羊-mé-á閣較濟,囡á sńg kah會唱歌,老歲仔人是行kah腳活beh--死。Tsit回特別揣一个免門票人閣少ê「畜牧中心」,tsit-ê所在知影ê人無濟,有停車場thang pha車,落車行無幾分鐘tio̍htio̍h-mé-á陣,1陣閣1陣,有êlê-lê無閒leh食草,有ê koh會走相jiok換所在,看起來大phiāng閣笨tshiâng ê身軀,看詳細tsiah知影in ê動作實在真liú-lia̍h,平衡感不止á tsán5个囡á sńg kah有驚惶、有笑聲,一下無張持suah pua̍h-pua̍h--倒,pua̍hpeh起來猶原phut-phut-tiô。大人除了看光景,斟酌囡á安全,tio̍h是翕相機、錄影機tsiâu無閒,兩老--ê上輕鬆,一个顧kapá sńg笑,一个顧家己欣賞山景。
山頂熱,才下晡四點外,來到「小瑞士」花園,無kài闊,有大欉樹á、水池、花草kap插真濟風吹輪á,風一下透,風吹輪á to̍h一直轉,因為安全危險,大人to̍h買咖啡來lim,放hōoá家己sńg,草埔á khǹg 1台金瓜車,大漢--ê A-kiâu bat代誌,to̍h phah派細漢--ê,有ê坐車內、有êniauá拖車,liâm-mi車頂liâm-mi車跤,peh tsiū peh落,tsôngtsông去笑哈哈,sńg bē-suah。等到食暗飽閣ē-tàng轉來看煙火kap水舞,看kah大人囡á攏歡喜kah
已經8點,趕緊去tshuē白熊屋景觀民宿」歇睏,民宿tio̍h tī 近位á,真緊to̍h tshuē--tio̍h主人飼5隻大白熊狗做in ê商標,為著趁錢有這種idia 嘛算有頭腦。Sńg規工--ā,囡áthiám--à,民宿早to̍h訂好勢,行李搬入房間趕緊á洗身軀,因為明仔載的旅途有較遠,所以開講一時仔to̍h隨人去捂捂睏。

清境農場:
清境農場好tshit-thô,透風落雨人煩惱,過度開發真毋好,山崩地裂欲如何。(o)
青青草原草青青,清境農場果子棚,上儕建築是民宿,破壞自然眾人罵。(enn/inn)
青青草原:
草埔羊mé-á真正儕,羊mé-á me̋ me̋ leh講話,歡迎逐家來做客,翕相散步攏好勢(e)
mé-á表演真心適,走相jiok me̋ me̋ me̋ ,冤家相觸me̋ me̋ me̋ ,觸嬴me̋ me̋ me̋ ,觸輸嘛me̋ me̋ me̋ 2009/11/11蕭平治