20010500_台灣俗語鹹酸甜第三冊 自序 Lah-jih(蕭平治)
台灣俗語鹹酸甜第一冊出版了後，就有朋友問講哪會beh lām用羅馬字？第二冊出版了後，閣卡濟人問起仝款ê問題，因為第二冊比第一冊lām閣卡濟羅馬字，煞hō͘人感覺比第一冊閣卡歹讀。Beh解說話頭長，kan-nā笑笑仔kā in會失禮：
「有影to-tio̍h，歹勢啦！拜託罔看罔ioh--lah，咱台灣人ê頭腦是一流--ê，頭殼ê翻譯能力真強，觀前顧後，硬ioh嘛beh kā ioh出來伊ê意思，台灣話會通，按怎看攏嘛看有。」
「看台文，讀台文，觀前顧後，罔ioh仔罔ioh，有影ioh有，可惜你寫ê台文，羅馬字lām傷濟，實在ioh-tio̍h chiâⁿ食力。人he寫漢字--ê，音若有合tiō讀伊ê音，音若無合tiō掠伊ê意，音字攏無合ê時陣，m̄-chiah觀前顧後用ioh--ê，你寫he羅馬字，阮抑無學，ho͘音ho͘無路理來，beh汰讀有、ioh有？拜託規氣攏總寫漢字，抑是羅馬字用較少--leh，若無，你敢知影，讀無看無ê結果，講一句粗嘴較無禮貌ê話，只好kā phiaⁿ tiàm 冊架仔頂歇睏。」
有冊看無ê鬱卒，有心推sak母語，煞讀無台語文ê無奈，敢chiâⁿ實無解決ê法度？Che tiō是寫台語文時常khǹg在心內思考ê問題。研究台語前後beh 10冬，對台語ê用字（書面語）觀念改變幾若擺，ùi「台灣話有話無字」到「台灣話有話有字」，閣ùi「台灣話有話有字」反倒轉來到「台灣話有話無字」ê認識，其中ê改變攏是tī漢字ê範圍內車跋反。Chit句話beh用tah chit字，hit字漢字，台語beh按怎讀，朋友相及研究ê 問題，仝款離bē開漢字ê爭執，péng字典，查韻書，舞kah目睭起ian-n̄g（煙暈），心狂火to̍h，頭昏昏，腦頓頓，chhōe無--ê猶原是chhōe無，爭論--ê猶原爭論bē煞，beh如何？越頭行回頭路，借音借意，仝款kap 以前「台灣話有話無字」罔寫罔拜託人ioh，實在m̄甘願。等到有一工，學著白話字（教會羅馬字）了後，觀念一改變，巧氣自然來，既然表意ê漢字無法度負擔台灣話ê全部，咱煞bē曉拜託拼音ê羅馬字來tàu幫忙，漢字是字，羅馬字嘛是字，漢字lām羅馬字，較贏借音借意，按呢『台灣話有話嘛有字』ê概念一下改變，真正扑通任督二脈了後，全身365筋節齊輕鬆起來，以前遐hō͘人借kah無路理來，hō͘人ioh kah 不答不七，惹人諍kah東倒西歪ê部分，馬上得著解決，chit-mái chhun--落來ê，kan-nā「愛學羅馬字」ê問題--niâ-niâ。
「He羅馬字阮也bē曉。」這是大部分朋友ê回應。
「Bē曉？Bē曉著愛學，敢m̄是？」雖然無人反對，m̄-koh真心beh學ê人無濟。
哪會按呢？『習性』所致，『習性』就是『慣性』，講歹聽就是pîn-toaⁿ，慣習成自然，長期培養ê概念贏過新觀念ê認知，知to知，m̄-koh做bē 到，『知道做不到』，奈何？『習性』ê轉變，需要有心、堅持、苦戰，套一句佛語，tiō是愛『精進』，無『精進』落去做，kan-nā用嘴講、用心想是無路用--ê。
台文路se̍h
360 度，ùi 「有話無字」se̍h到「有話有字」，即閣ùi 「有話有字」se̍h轉來「有話無字」，到此當今又閣ùi 「有話無字」，se̍h 到「有話有字」，其中「有話有字」觀念ê轉變，已經kap原來--ê無仝款，chit chióng轉變ê經驗，會使chit hō͘逐家做參考，hō͘ beh潦落來研究台語、寫台文ê朋友，省去真濟『嘗試~錯誤~嘗試~錯誤』ê誤tâⁿ，省去真濟時間精神。
『台灣話有話嘛有字』，漢字是字，羅馬字嘛是字，認真學羅馬字，羅馬字若學通，beh寫台文一定無問題，「我ê手寫我ê嘴，我ê電腦拍出我ê話。」Chiah-ni̍h簡單ê khang-khòe，朋友！你敢beh潦落來試看覓。Beh愛知影台語文讀寫訓練基本觀念認識，請你閣看一擺第二冊台灣俗語鹹酸甜ê序文「拍開人生另外一扇窗」。
感謝你來看chit本冊，嘛拜託提出意見，thang做參考，台語文需要逐家tàu推sak，無仝ê建議，是重新思考ê方向，仝味ê看法，是上好ê鼓勵，建議、鼓勵，攏是繼續扑拼ê助力，先kā逐家感謝！
下面le̍k（抄錄）一寡台灣話hō͘逐家思考：「漢字負擔太沈重，需要羅馬字tàu幫忙」，是m̄是有道理，有伊ê必要性。
手ê 動作：
囝仔人m̄-thang（m̄通）冤家sio-phah (相扑)：小孩子不可吵架打鬥。
Hō͘伊táⁿ-tia̍p（打）kah足thiám（忝）--ê：給他整得好『慘』（疲累）！
M̄聽話，轉來tiō kā你tia̍p--死：不聽話，回來就將你毒打一頓。
輕輕仔kā伊ê手gīm--leh ：輕輕的將他的手握著！
你phah-sǹg（拍算）beh按怎？：你打算要怎麼辦？
Bē使烏白tèng（釘）釘仔：不可以隨便釘釘子。
兩人冤家leh
tèng（釘）孤枝：兩人在一對一打架。
M̄免kòng鑼，嘛m̄免phah（拍）鼓：不必打鑼，也不必打鼓。
師傅leh
tûi（鎚）鐵phiáⁿ（片）：師傅在鎚鐵片。
Kā（給）我ê尻kha-phiaⁿ
tûi-tûi（槌）--leh：把我的背搥一搥！
用棍仔hám（撼）一下：用棍棒使力敲一下。
用藤條siāu二下：用藤條用力打二下。
用掃梳gîm仔sut（甩、摔）三下：用掃把的小竹支抽三下。
Být kah h³ 你走無路：『用力』打得你走頭無路。
閣講就kā（給）汝bok落去：再說就賞你拳頭吃。
拜託你ùi 後壁tàu sak：拜託你從後面幫忙推。
Siak（摔）kah大孔細裂：摔得頭破血流。
Mài kā我giú手：不要跟我拉手。
伊kā我ê頭鬃khiú--leh：他將我的頭髮揪住。
Khan（牽）囡仔ê手tiö sè-jī（著細膩）：牽小孩子的手要小心。
伊kā我liàm（捻）嘴phóe：他擰我的臉頰。
Beh食家己ni（拈、捏）：要吃自己拿。
Khiau（蹺、曲）腳lián（撚）嘴鬚：翹腳撚鬍鬚。
伊leh
lián（撚）紗仔線：他在撚紗線。
阿公kā我so（搓、搔）頭殼：爺爺把我的頭摸一摸。
足chiūⁿ（癢），kā我jiàu-jiàu（抓）--leh：好癢，幫我抓抓癢。
Lia̍h（掠、抓）龍lia̍h半尾：抓龍抓半尾。
Liàu（抓）耙仔一支：不求人一支。
Khàng（控）粒仔疕：摳瘡疤。
Tiak ōng梨看有tēng--無？：敲一敲鳳梨，看一看硬不硬？
Lia̍p-lia̍p（捏）tēⁿ-tēⁿ（掟）--leh，無beh買：摸一摸，按一按，就是不買。
Të°（掟）h³ ân（緊），˜-thang lãk（落）--落去：捏緊，不可掉下去。
The̍h（提）hō͘好，chiah-bē lak--落去：拿好，才不會掉下去。
囝仔人m̄-thang
冤家sio-cheng（相爭）：小孩子不可以吵架打鬥。
去hō͘車lòng（撞）--著：被車子撞到。
兩人sio-tōng（撞）：兩人相碰。
Khia̍k五斤枷：用五支指背敲打頭。
水道頭chūn（鏇）hō͘ ân：水龍頭轉緊。
糞埽tàn落去糞埽桶：垃圾丟進垃圾桶。
Ôa ~，hō͘我hiat掉--去à：哇！給我丟棄了。
球khian過來chit旁：球丟過來這邊。
無路用ê物件phiaⁿ-phiaⁿ hìⁿ-sak：不能用的東西，都把他摔掉丟棄。
伊iô（搖）手講無愛：他搖手說不要。
食老póe
無土豆：年紀大了，撥沒有花生。
乖！媽媽惜，媽媽kā你hu-hu（敷）--leh：乖！媽媽疼，媽媽幫你揉揉。
Ngiáu（撓）耳孔屎：挖耳屎。
屎ha̍k仔愈lā（撈、撓）愈臭：廁所愈攪愈臭。
Hit隻龜仔kā jôe hō͘死：那隻蟲子把牠搓死。
Chit粒hāi（壞、害）--ê，kā tìm 掉：這粒壞的，把他丟掉。
沒有留言:
張貼留言