崁頂蕭姓朝宰公廷光公輝騰公志榮公家譜歌: Lah-jih_2012-2014

崁頂蕭姓朝宰公廷光公輝騰公志榮公家譜歌：      Lah-jih_2012-2014

崁頂古早屬平埔，阿立昆族ê住所，阿立昆是Arikun，母系社會阿立祖。

崁跤大潭親像鏡，擋仔潭是伊ê名，漢字寫做卓乃潭，無合在地ê原聲。

西北爿面有潭墘，魚寮仔佇北爿面，西爿榕跤下橛仔，厝邊隔壁情綿綿。

崁頂地勢懸閣在，自古罕得做水災，厝宅集中真和諧，攏是蕭姓團字派。

康熙進前非中國，一六八三降皇清，一七五八乾隆時，賜姓熟番歸漢族。

乾隆一七八六時，滿化已經三十年，祖媽墓牌題皇清，是乜緣故真可疑。

蕭姓堂號是書山，為何題名無照辦，其中必定有緣故，若無祖公袂糊塗。

總講一句年代久，揣無真相佇何處，認祖認到朝宰公，有證有據萬古流。

朝宰祖公復興租，一冬收粟難計數，五房鬮書分財產，鬮書寫得像賬簿。

輝騰厝宅有三處，下庄兩處揣無主，崁頂志榮咧繼承，鬮書記載歷史久。

兩塊墓牌是古物，兩份鬮書文獻述，字字句句是史實，年代人名無撞突。

五房互相鬥相拱，廷光單傳蕭輝騰，輝騰囝孫五大房，只有志榮有傳承。

朝宰開基艱苦情，二代廷光來繼承，三代輝騰傳五房，四代志榮蹛崁頂。

志榮公有四个囝，四房正財無囝命，正頌搬去田中央，正煥正養崁頂庄。

古早崁頂瓦厝底，就是志榮的徛家，崁頂路編七一號，向東向陽好厝宅。

肇基四代一脈傳，兩百年前真艱難，奠基囝孫做基礎，跤踏實地是模範，

朝宰囝孫大家族，樸實家教袂刻薄，朝廷輝志至正大，光昌興家到輔國。

蕃薯落土代代湠，釘根旺欉振家聲，各行各業認真拚，族親相伨一定贏。

蕭家囝孫巧koh gâu，志氣高貴袂誇口，榮宗耀祖蔭咱兜，公道做人好名留。

開基已經三百冬，跤踏實地台灣人，囝孫旺盛有向望，貢獻社會責任重。

蕭家家譜世傳世，各派各房照實題，生住異滅輪流踅，生老病死人人會。

喜怒哀樂愛惡欲，修養毋通發性地，慈悲為懷日日過，歡喜人生是咱的。

每人巧氣無共款，需要栽培著讀冊，讀gâu會當獻社會，讀輸毋是你的罪。

人有賢能佮頇顢，能者多勞多幫贊，頇顢嘛免傷怨嘆，認真拍拚袂予散。

蕭姓宗親滿四界，至親才會蹛做伙，喙齒咬舌攏嘛會，兄弟難免會冤家。

冤家宜解不宜結，開闊心胸理通達，志榮囝孫上蓋親，過去恩怨放挕捒。

咱若冤家閣勞債，別人看咱無目地，志榮囝孫若有和，別人毋敢看咱無。

慎終追遠盡孝道，敬宗尊祖著愛做，祖公祖媽攏呵咾，祖媽特別是家寶。

二一世紀新世界，自由平等新時代，男女平權的社會，互相尊重真和諧。

重男輕女無合時，觀念需要來改變，栽培序細重開始，無分巧戇抑男女。

教育子弟順自然，尊重成長的少年，毋通迫害囡仔栽，毋通放囝浪溜嗹。

祈求各房大吉昌，事業發展有理想，生活快樂身體勇，閤家平安大吉祥。

【註解說明】

1、 七字仔詩歌本身，注重歷史真實，節奏好聽好唸，不求每句押韻。

2、擋仔潭tòng-á-thâm，卓乃潭(toh-nái-thâm)。

3、榕跤下橛仔：三潭國小北爿hit庄，有人講「榕仔跤」有人講「ē-koe̍h-á」，意思是講Tóng-á潭ê『下半段』。

4、 滿化：滿清統治台灣，台灣接受滿清ê文化，所以「漢化」實際是「滿化」。

5、 下庄：ē-chng，龍潭里。頂潭里/崁頂mā 號做頂庄。

6、 撞突：tōng-tu̍t。

7、 鬥相拱：tàu sio-kēng，互相支持、幫忙。

8、 相伨：sio-thīn，互相支持、幫忙。

9、 巧koh gâu：khiáu koh gâu。

10、       輪流踅：lûn-liû-se̍h，輪迴。

11、        頇顢：han-bān。

12、       放挕捒：pàng-hìⁿ-sak，『丟棄』「放下」。

13、       冤家勞債：oan-ke-lô-chè，「吵吵鬧鬧」。

14、        無目地：bô-ba̍k-tē，「看無起」。

15、        浪溜嗹：lōng-liu-lian。