2014年10月28日 星期二

古物仔_嫁娶篇_粿印:陳慶芳收藏/蕭平治翕相

古物仔_嫁娶篇_粿印:陳慶芳收藏/蕭平治翕相
▲粿是敬神拜神謝神ê祭品,是親成送禮ê禮數,是厝內有喜事貺厝邊頭尾ê食物。做粿著用粿印做模印tsiâⁿ有意思ê圖樣,
做粿ê粿印,通常刻有龜、桃、餅、牽仔liau、丁錢5種印模,龜表示長歲壽;桃是壽桃kap tshit-thô;圓形--ê是餅,tn̂g-liau形--ê號做牽仔liau,丁錢較特別,有特殊ê祭拜tsiah用會著。
拜天公需要khan-á-liau,拜神明一定著紅龜粿,娶人客to̍h做桃粿。通常講紅龜粿是指有ní紅番仔米ê紅色壽龜kap壽桃,用來拜神拜公媽,桃模印ê桃粿,ē使得做等路,嬰仔四月日轉外家阿媽兜,tshit-thô幾工後bueh轉--去,外媽ē送1-lam雞仔囝做tshuā-lō͘雞仔,kap做紅桃粿hō͘孫--ē tsah轉去做等路,hīng厝邊隔壁。ùi「好歹粿著愛會甜,好歹查某著愛會生」kap「紅龜紅龜,包土豆仁麩」tsit 2句俗語to̍h知,糖kap土豆仁麩是粿餡(kué-āⁿ)kài重要ê原料,菜脯米仔餡、土豆麩鹹菜餡、痲仔餡、紅豆餡mā真普遍。
餅是圓形ê粿,m̄是糕餅,kap紅龜粿仝款,tsit-mái較少人用。牽仔liau有人講做牽仔粿,圓形tâng-sián(銅錢)疊相連做1-liau,tio̍h 僎12-liau,閏月加1-liau,意思是錢財日日牽相連,月月接紲,是拜天公專用,正月初九天公生(玉皇大帝), 正月15、7月15、10月15三界公生(mā是天公)kap下願答謝天公tsiah-tio̍h tshuân;丁錢形體kap牽仔liau tsiok-sîng,mā是圓形tâng-sián(銅錢)疊相連,不過銅錢中央有浮釘,表示膦鳥,生查埔出丁ê意思,拜喪培墓tsiah有用。
以上tsia-ê粿攏是染紅色,若kā粿粞(kué-tshè)tsham鼠麴仔(tshí-khak-á)nuá做伙,to̍h pìⁿ-tsiâⁿ芋仔色,叫做鼠麴仔粿、ō͘-tsháu粿、ō͘-tsháu-ku,食--起來加真khiū真好食,m̄-koh bē使得拜神明,kan-nā ē-tàng培墓、拜公媽、地基主、好兄弟仔。
△紅龜粿印:tsit種tshiūⁿ模具ê粿印,較好印,形體一致,無法度展現做粿ê功夫藝術,適合生理人ê氣口。

△特大紅龜粿印:一般粿印4-5倍大,四角頭閣有細隻龜,中央刻 字,嫁娶專用。

△粿印坦邊ê印模是khan-á-liau印,拜天公專用,著備辦12-liau。

△丁錢印:kap khan-á-liau無仝。

△桃印:仙桃ê造型,中央刻壽字,祝壽ê粿,mā有「tshit-thô」ê含意,邀請「來tshit-thô」做人客。

△khan-á-liau印:3-liau 合做一塊,印4塊to̍h有12-liau。拜天公專用。

△餅印:圓形代表餅,有圓滿ê意思,現此時罕得看--著。

▲草仔粿:Hakka(客家)ê鼠麴粿,猶未炊熟,粿葉仔/粿箬仔用硬桃葉(ngē-thô/ge̍h-thô)[月桃],kap Ho-Lo(Hō-ló)人用弓蕉箬無仝。雖罔無染紅色,仝款ē使得拜神。





俗語:好歹粿to̍h-ài會甜;好歹查某,to̍h-ài會生。
俗語:紅龜紅龜,包土豆仁hu。

2014年10月25日 星期六

古物仔_嫁娶篇_傳統樂器:陳慶芳收藏/蕭平治翕相

古物仔_嫁娶篇_傳統樂器:陳慶芳收藏/蕭平治翕相
▲傳統樂器分武場樂器kap文場樂器:
武場樂器:鼓、板、鈔、鑼、吹。
文場樂器:絃、吹、吊規仔、二絃(和絃)、三絃、大管絃、品。
娶新娘陣頭北管子弟陣、八音ê樂器有:鼓架頂ê tak鼓、通鼓(小鼓)、拍板,tháiⁿ鑼,鑱仔(tshîm-á),tshê-á,銅鑼,鼓吹[嗩吶];殼仔絃,吊規仔[京胡],二胡,大管絃,三絃,倒品。


tak鼓/phiak鼓/lak-tak-á:聲音tīng、kiat、響koh有力,是吹場總指揮,tak鼓師傅是頭手師。
拍板(phik-pán)/khiauh-khiauh-á:竹片或柴板,兩塊或三塊結做伙,配合tak鼓,倒手提拍板,正手鼓箸拍tak鼓做節奏,kap南管拍板無仝。指示絃管、唱曲ê板嘹(pán-liâu)。
小鼓:mā叫做通鼓,武場樂器上鬧熱to̍h是鼓聲,輔助tak鼓增加氣勢,是二手師。
殼仔絃(khak-á-hiân):絃管主奏樂器,共鳴箱是椰子殼,梧桐通面,mā叫做椰絃,絃弓縛馬尾,一般用樹絲代替,松膠直接滴黏tī音箱頂面,絃線用鋼絲,大細條分做公母線,聲音懸bē尖,充滿活跳有精神ê力度。
△吊規仔kap洞簫:吊規仔(tiàu-kui-á)mā叫做吊鬼仔,聲音比殼仔絃koh-khah 懸,是京戲主要樂器京胡,tī子弟(團)m̄是必要樂器;洞簫是竹仔做ê樂器,聲音真沈哀怨,tī子弟(團)m̄是必要樂器。
△大管絃(tuā-kóng-hiân):音箱是柴刻--è,比二胡(和絃)koh-khah大,用梧桐做通面,聲音低、沈,挨反管kā殼仔絃和聲真好聽,mā是一種和絃。
鼓吹(kó͘-tshue)[嗩吶]/笛仔ta̍t-á/噯仔ài-á
*鼓吹以懸低調分大吹、中吹、小吹,司公道士歕大吹,子弟(團)歕中吹,布袋戲歕小吹。
*笛仔(ta̍t-á):音調比小吹閣較高音,幼聲活潑。
*噯仔(ài-á):比笛仔ta̍t-á較大支,是南管ê吹。
*鼓吹、笛仔、噯仔ê歕喙需要引仔(ìn-á),是蘆荻(lô͘-ti̍k)ê骨做--è。引仔(ìn-á)就是[引子/吹印/哨子],蘆荻就是蘆葦。
△鑱仔(tshîm-á)(大鈔):有拍節奏ê作用,聲音大koh吵,增加鬧熱氣氛,tshng紅布liau做la̍k耳[抓把]。
tshê-á(小鈔):tshng紅布liau做la̍k耳[抓把]。
△銅鑼(tâng-lô):特色是中央phok 1-lu。khong khong khong khong ê聲音較柔,無響鑼hiah-nī大聲hiah-nī吵。
△響鑼(hiáng-lô)kap鑼槌:響聲「khuaiⁿh khuaiⁿh khuaiⁿh khuaiⁿh」,真吵真大聲,m̄-koh真鬧熱。鑼槌是木造。
△鼓槌/銅鐘槌:縛紅布是喜事,mā會hō͘鐘聲較好聽。
ㄨ譜:士上 合乙/-/合士 合工/-/六工/ㄨ六 工六/-/上工 ㄨ上/士合/工六/ㄨ六 工ㄨ/上乙/士合 工合/士 乙ㄨ/-/

模擬鑼鈔tak鼓聲:leh lak-ta̍k tshih-taiⁿ tshih-taiⁿ khuaiⁿh、lak-ta̍k tshih-taiⁿ tshih-taiⁿ khuaiⁿh!
模擬鑼鈔聲:nai-taiⁿ tshi̍h-taiⁿ tshi̍h-taiⁿ khuaiⁿh!nai-taiⁿ tshi̍h-taiⁿ tshi̍h-taiⁿ khuaiⁿh!
形容走真緊:走kah ná phiak鼓箸--leh。
俗語:年簫、月品萬世
俗語:月品年吹萬世絃。
俗語:年吹、月品萬世
俗語:拍鼓--è li̍k死歕吹--e。
俗語:bē-hiáu 挨絃仔顧絞線,bē-hiáu歕吹顧吞瀾。 

2014年10月22日 星期三

古物仔_嫁娶篇_梳妝鏡/鏡台:陳慶芳收藏/蕭平治翕相

古物仔_嫁娶篇_梳妝鏡/鏡台:陳慶芳收藏/蕭平治翕相
▲愛媠是人ê天性,女人愛媠是天生,梳妝、照鏡是日日平常事,所以新娘嫁妝siāⁿ底必定有鏡有鏡台。
古早富戶人家新娘房偌奢華無了解,田庄一般家庭新娘房內是1頂眠床kah 1隻桌櫃仔,桌櫃頂囥1-kâi鏡台。桌櫃屜囥衫仔褲,鏡屜仔囥捋仔、柴梳、蝨篦、胭脂、水粉kap針線補紩ê幼粒物,另外眠床壁邊ē囥1跤尿桶、1跤屎桶。to̍h是tsiah-nī簡單,免怨嘆,猶有比按呢koh-khah無--ē。
△有柄ê梳妝鏡,是恁祖媽時代ê寶物,掛柄ê柴框,一手提鏡一手攑捋仔抑是抹粉、點胭脂。
△有柄ê梳妝鏡,若是配合桌櫃頂鏡台,to̍h ē-tàng看著後斗殼仔ê頭毛,捋了有媠--bò͘?金釵、玉釵插了有正--bò͘,實在有夠好用,有夠方便。另外ē-tàng hō͘囡仔耍,做反射鏡,kā外口ê日頭光tshiō入來厝內底。
△khǹg tī桌頂ê圓鏡,一面是鏡,一面是尪仔相,ē-tàng tshiâu角度,ē-tàng提tiàm手裏,方便koh ē-tàng看媠。
△細型ê梳妝鏡,箱仔形,有屜仔,鏡面活動--ē,ē-tàng收起來khǹg tī箱仔內,搬徙扭掠。
細型ê鏡台,長篙圓ê梳妝鏡真súi款,ē-tàng調整角度,有屜仔thang 囥幼粒物仔,khǹg-tiàm桌櫃頂。
大型鏡台,梳妝專用,有屜仔,雕花古雅,koh-ū彩畫玻璃tsng-thāⁿ[裝飾],是官家、富戶人tsiah有ê嫁妝。
中型鏡台,長方形梳妝鏡,木工簡單樸實,khǹg tī桌櫃頂使用。
荔鏡緣:陳三磨鏡,五娘哭兄。
俗語:bái查某愛照鏡,歹命人愛相命。
謎猜(bī-tshai):兩姊妹仔平懸平大,一个佇內,一个佇外。

2014年10月19日 星期日

古物仔_嫁娶篇_siāⁿ籃:陳慶芳收藏/蕭平治翕相

古物仔_嫁娶篇_siāⁿ籃/siāⁿ籃仔:陳慶芳收藏/蕭平治翕相
▲siāⁿ籃/siāⁿ籃仔:
用竹篾仔pīⁿ ê圓形竹籃仔,編織真súi真工夫,有仔有siāⁿ籃蓋,ē-tàng用扁擔擔,ē-tàng用手捾,ē-tàng吊tiàm厝頂下跤,貯禮品送禮,拴牲醴、祭品拜拜,擔點心、食物、粿粽攏真方便koh好看頭,一般lóng是成雙成對,大型--ē是siāⁿ籃,細跤--e叫siāⁿ籃仔。
△手路幼字有花紋彩色ê siāⁿ籃,雙層有蓋,有手捾有圓形ê耳。好額人leh用--ē,看--起來高貴、幼秀。Hakka(客家族)盛籃。
△真súi ê siāⁿ籃,1-tàⁿ 2-kha,用平擔擔to̍h ē-sái-chit,因為siāⁿ籃貯ê物件bē過頭重,罕得超過100斤(台斤)。
△siāⁿ籃內面分雙層,面頂hit層叫罾仔(tsan-á)。
△tsit擔有4層,若囥到tīⁿ,可能需要用曲擔擔。khiau-taⁿ taⁿ。
△siāⁿ籃仔:倒爿竹pīⁿ--ē,正爿木造--ē,lóng是圓形--ē。
△用捾ê siāⁿ籃仔,廟裏燒金拜神,貯金紙、香、糖餅,是古早貴夫人ê身份。
△捾籃仔假燒金to̍h是tsit種siāⁿ籃仔。

△che是一般庄腳人作 穡人厝內必備ê siāⁿ籃,有罾仔(tsan-á)、無蓋,有捾mā有耳,擔禮物、食物、點心甚至焦料、菜蔬攏總好。囥高級焦料(ta-liāu指乾性食品,如魷魚、香菇、木耳等),吊佇kuân-kuân ê楹仔下,安全khah-bē hō͘貓仔、niau鼠偷食。
俗語:捾籃仔假燒金。



2014年10月17日 星期五

古物仔_嫁娶篇_八卦米篩、siāⁿ、kioh-á:陳慶芳收藏/蕭平治翕相

古物仔_嫁娶篇_八卦米篩、siāⁿ、kioh-á:陳慶芳收藏/蕭平治翕相
▲八卦米篩(pat-kuà-bí-thai):
娶新娘陣頭上頭前to̍h是竹掃吊豬肉liau,辟邪白虎神;後壁新娘轎除了八仙彩以外,轎頂是有頭有尾ê紅甘蔗,轎後著愛掛米篩。
八卦米篩是娶新娘避邪ê民俗用品,m̄是篩米ê米篩,頂面有紅色八卦圖,遮閘新娘頭殼頂,ē-tàng辟邪。
囝婿坐轎kā米篩khǹg-tiàm轎內去娶新娘,到kah新娘兜,囝婿kā新娘牽出門外時,媒人婆--à著kā米篩jia-tsa̍h新娘頭殼頂去坐轎,然後kā米篩縛tiàm轎後,等到娶入門tsiah-koh提米篩遮閘新娘(有ê 會叫好命人提米篩)入厝內。新娘若是有身(娠孕)to̍h改用烏雨傘。娶新娘若無掛米篩,眾人to̍h-ē議論紛紛,佇hit个頂甲子ê年代。
竹掃、米篩辟邪ê路用,tī歌仔戲齣「周公鬥法桃花女」內面有描寫。
講好話:米篩giâ kuân-kuân,生囝生孫中狀元。
講好話:米篩遮新娘,做人新婦有好樣。
講好話:新娘hāⁿ戶橂(hō͘-tīng),生後生頭殼tīng,生查某囝真聰明。
講好話:新娘行入房,從今做大人。
講好話:新娘坐正正,才會得人疼。
講好話:新娘坐向東,歡喜嫁好翁。向(ǹg)
講好話:新娘坐向西,賢慧通人知。
講好話:新娘坐向南,翁婿雙手攬。攬(lám)
講好話:新娘坐向北,新娘睏坦笑,新郎睏坦覆。坦笑(thán-tshiò)/坦覆(thán-phak)
▲siāⁿ(盛)/大盛:
有錢人娶新娘、做生日送禮用來貯禮物ê器具,漆紅色ê柴箱,有手捾仔,ē-tàng捾(kuāⁿ)mā ē-tàng用棍仔扛。
△有khàm蓋ê大siāⁿ:囥無bueh hō͘人看ê禮物。





△無khàm蓋ê大盛:排疊súi-súi展寶hō͘人看。


△大siāⁿ有柴捾(kuāⁿ),ē-tàng long棍仔雙人扛。

▲kioh-á:
簡單型ê盛,kan-nā淺淺長liau四角型無蓋ê柴箱仔,叫做kioh-á,縛索仔耳兩人用棍仔扛。娶新娘男方tsit爿用來囥金炮燭、轎斗圓、豬爿、紅露酒、清酒、花盤、糖仔餅、檳榔等等禮物,數量著tàu雙,見四m̄用,上好是6項、12項。嫁查某囝女方tsiah用tsia ê kioh-á貯回禮kap新娘嫁妝,每項嫁妝攏需要貼紅紙抑是「」字剪紙,排疊tiàm kioh-á內,che是一般家庭上捷看著ê型式。除了金器銀器ê phua̍h-liān tshiú-tsí 佮現金,其他嫁妝攏看現現,時常引起厝邊頭尾議論紛紛,增加一寡話屎,嫁妝若濟,大家官歡喜在心內,有ê新娘koh-ē hiau-pai,若是嫁妝傷少,新娘to̍h-ē iap哀。

2014年10月16日 星期四

古物仔_嫁娶篇_新娘轎(柴轎):陳慶芳收藏/蕭平治翕相

古物仔_嫁娶篇_新娘轎(柴轎):陳慶芳收藏/蕭平治翕相
▲柴轎:選hit-lō tīng koh韌bē蛀ê木材,需要真幼路ê kap-tsoh(木匠)師傅、雕刻師製作。無論浮雕、鋸雕,貼金箔、畫花鳥,lóng是吉祥花紋,轎門、轎窗nê門籬仔,後壁面有通風空,減少翕熱koh ē-tàng佮外口講話。kui頂轎漆紅漆,紅絳絳充滿喜氣,紅色雙喜 」貼兩爿轎窗,紅頂四轎to̍h是tsit種『花轎』。
Tsiah-nī貴氣ê新娘轎,當然需要大排場陣頭kap排列成隊ê大siāⁿ(內面貯嫁妝)綴後,tsiah配會得過,官家人子弟抑是有錢好額人查某囝tsiah ē堪得有tsit款排場,一般人家若有竹轎thang坐to̍h歡喜佇心內。
轎蓋ê雕刻、花紋、色水。轎窗貼  字。
後壁通風空,活動--ē,風口佇下面,有隱密作用,古早人較pì-sù。頂面貼  字。
轎篙孔四角形,轎篙需要選tīng、韌、勇koh直絲ê木材製造。


轎座仝款粧kah súi-tang-tang。
轎內kan-nā囥1張細隻柴椅,未免siuⁿ簡單,坐久敢bē跤酸 尻川䫌疼。莫怪俗語按呢講:扛轎--ē喝艱苦,坐轎--ē mā喝艱苦。
柴轎(紅頂四轎)需要4个轎夫扛,所以需要轎索,轎索是用棕簑毛抑是樹絲(龍舌蘭ê一種)pīⁿ,m̄驚雨淋,堅固耐用。
花轎ê模型,真súi。
俗語:紅頂四轎扛m̄行,包袱仔款款--leh綴人走。
俗語:扛轎--ē喝艱苦,坐轎--ē mā喝艱苦。