2014年10月22日 星期三

古物仔_嫁娶篇_梳妝鏡/鏡台:陳慶芳收藏/蕭平治翕相

古物仔_嫁娶篇_梳妝鏡/鏡台:陳慶芳收藏/蕭平治翕相
▲愛媠是人ê天性,女人愛媠是天生,梳妝、照鏡是日日平常事,所以新娘嫁妝siāⁿ底必定有鏡有鏡台。
古早富戶人家新娘房偌奢華無了解,田庄一般家庭新娘房內是1頂眠床kah 1隻桌櫃仔,桌櫃頂囥1-kâi鏡台。桌櫃屜囥衫仔褲,鏡屜仔囥捋仔、柴梳、蝨篦、胭脂、水粉kap針線補紩ê幼粒物,另外眠床壁邊ē囥1跤尿桶、1跤屎桶。to̍h是tsiah-nī簡單,免怨嘆,猶有比按呢koh-khah無--ē。
△有柄ê梳妝鏡,是恁祖媽時代ê寶物,掛柄ê柴框,一手提鏡一手攑捋仔抑是抹粉、點胭脂。
△有柄ê梳妝鏡,若是配合桌櫃頂鏡台,to̍h ē-tàng看著後斗殼仔ê頭毛,捋了有媠--bò͘?金釵、玉釵插了有正--bò͘,實在有夠好用,有夠方便。另外ē-tàng hō͘囡仔耍,做反射鏡,kā外口ê日頭光tshiō入來厝內底。
△khǹg tī桌頂ê圓鏡,一面是鏡,一面是尪仔相,ē-tàng tshiâu角度,ē-tàng提tiàm手裏,方便koh ē-tàng看媠。
△細型ê梳妝鏡,箱仔形,有屜仔,鏡面活動--ē,ē-tàng收起來khǹg tī箱仔內,搬徙扭掠。
細型ê鏡台,長篙圓ê梳妝鏡真súi款,ē-tàng調整角度,有屜仔thang 囥幼粒物仔,khǹg-tiàm桌櫃頂。
大型鏡台,梳妝專用,有屜仔,雕花古雅,koh-ū彩畫玻璃tsng-thāⁿ[裝飾],是官家、富戶人tsiah有ê嫁妝。
中型鏡台,長方形梳妝鏡,木工簡單樸實,khǹg tī桌櫃頂使用。
荔鏡緣:陳三磨鏡,五娘哭兄。
俗語:bái查某愛照鏡,歹命人愛相命。
謎猜(bī-tshai):兩姊妹仔平懸平大,一个佇內,一个佇外。

沒有留言:

張貼留言