古物仔_走街生理篇_鐵馬修理鐵馬：陳慶芳收藏/蕭平治翕相

古物仔_走街生理篇_鐵馬修理鐵馬：陳慶芳收藏/蕭平治翕相
▲鐵馬(thih-bé)：有人講腳踏車，有人講孔明車，mā有人講自轉車、兩輪車、自行車、自由車，總--是講鐵馬ê人猶是較普遍。騎馬>騎鐵馬；駛牛>駛鐵牛。
△箍圓ê鐵馬鎖kap磨電火：利用樹奶輪ê外奶磨振動來發電ê發電機，叫做磨電火，跤踏仔踏愈緊電愈飽，掛tī頭前ê電火球仔to̍h愈光。

△馬喨仔(liāng-á)：鐵馬輪se̍h振動，利用lián-tsí-á(輪止仔)pué有發條ê鐘槌仔摃鐵馬喨仔(liāng-á)，liang liang liang liang，鐵馬來--à，緊閃開，讓我過！

△(鐵)馬角仔、前擋後擋ê控制杆(kuaiⁿ)、虎骨頭前閣有補助骨、磨電火ê電火頭(電火球仔)掛tī-tsia。

△Tsit台是雙台--ē，車架有兩杆(nn̄g-kuaiⁿ)，正牛皮ê鐵馬坐仔，堅固耐用閣好坐。

△雙台鐵馬m̄-nā雙杆，頭前閣有補助骨，後載真大真勇，ē-tàng載重載，100斤200斤甚至超過4-5百斤重，往過是做穡人、生理人搬貨載貨ê重要工具。用棍仔kah-tiàm後載，一爿一跤米籮抑是弓蕉籠。

△Tsit台較紳士形，鐵馬鏈仔有保護ê外殼，khah-bē鐵馬鏈仔咬著褲跤，傷著跤蹄。m̄-koh鐵馬若落輪to̍h較oh修理。

△鐵馬塗tshāi-á真在真四正。

△後擋是掛皮仔ê手擋。
△頭前輪是頭前擋，後壁輪是後擋。用手tēⁿ是手擋，用跤倒踏叫跤擋。

△後擋是跤擋，he輪心看起來較大是跤擋，利用跤踏仔倒踏時，to̍h-ē停車擋tiam̄。50年前ê鐵馬真普遍。

△車架橫杆放低，適合女性穿裙hāⁿ起去椅坐仔。

▲修理鐵馬：鐵馬tī 1950年代進前是真方便真高貴ê交通工具，貴蔘蔘，一般人買bē起，除非是有錢ê好額人買來騎phok-sóng(博爽)，抑是食頭路人為著體面，tsiah-ē tshân-tshân hak來騎。若是一般人，抑是做生理，為著來來去去ê方便，只好去買二手貨，二手貨to̍h是舊鐵馬，自然毛病濟，厚沙屑，m̄是消風，to̍h是破輪，若是píng車、lòng-tio̍h電火柱仔、tsing壁，to̍h需要去鐵馬店修理。
鐵馬害--去著用牽--e抑是用夯--è，庄腳到市街，一tsuā路躼躼長實在tsiâⁿ歹紡，好佳哉有he專門修理鐵馬ê師傅ē來「到位服務」。
△lián-khing-tâi(輪框台)：tsit-kâi家私kài重要，華語叫做『輪圈矯正器』，台語號做lián-khing-tâi(輪框台)，kah鐵馬輪ê lián-khing(輪框)有正無正to̍h是靠tsit台。

△liáng-pîng-piⁿ--a(兩爿邊--a)兩粒螺絲穿過鐵馬輪ê輪心，hō͘輪ē使得踅振動，中央較細箍「門」字形ê鐵仔，ē使得徙懸徙低，適合24仔、26仔、28仔(24、26、28英吋)，kā輪框kah hō͘正，tsiah鎖lián-tsí-á(輪止仔)。tsit-kâi lián-khing-tâi(輪框台)現此時猶leh用，是日本製。(75歲鐵馬店頭家/師傅講)