古物仔_走街生理篇_砧皮鞋：陳慶芳收藏/蕭平治翕相

古物仔_走街生理篇_砧皮鞋：陳慶芳收藏/蕭平治翕相
▲進步ê科技、發展ê經濟，帶動消費mā-suah養成人ê討債習性。鞋 除了是保護跤蹄ê足下，閣是追求流行ê妝娗，1雙2雙無夠，人人幾若雙tī鞋櫥內，擲掉兌換(thùi-uāⁿ)m̄是因為害--去、破--去，是因為綴bē著時行，啥乜叫做砧皮鞋補皮鞋，少年兄姊已經m̄-bat。
物質欠缺(khiàm-khueh)ê時代，1雙皮鞋是好額人ê標記、食頭路人ê體面(thé-biān)，無特別都合m̄甘穿出門。彼當陣ê皮鞋是kō͘手工刺，刺皮鞋著先量跤pô͘畫鞋樣，koh-tio̍h試穿tsiah開始刺皮鞋，雖罔手工，總--是材料無tsit-mái tsiah勇koh耐穿，不sám時tō-ē落鞋蹬(lak ê-teⁿ)斷thīⁿ線，尤其是查某人ê懸屐仔(kuân-kia̍h-á)鞋，鞋底萎--去(ui--khì)，鞋屐皮仔lak--去⋯tn̄g-tio̍h tsit款情形，修理皮鞋擔頭仔行一逝(1-tsuā)to̍h kā你修理好勢。
△修理皮鞋êミシン/裁縫車：kō͘手絞，1針1針勻勻仔車，bē-tàng急，修理皮鞋ê師傅lóng-bē急性，做穡專注功夫慢。

 △工具箱：車、thīⁿ、鑽、lak、tìng，割、鉸、摃、抹、lù、漆、擦，各種家私，原料，逐項有。

 △皮鞋是無規則ê立體皮質，tīng閣韌，需要大支車仔針，大條粗勇m̄驚水ê車線，針台所在需要好轉踅，適合無仝所在無仝方向ê車thīⁿ。

 △用手絞，帶動振動。

 △柴椅仔，ē-tàng囥物件mā ē-tàng hō͘人客坐。

 △tsit隻低籐椅是師傅做穡坐--ē。








△1960年代台中師範學生宿舍涼亭跤ê補鞋阿伯，長期為學生服務，趁淡薄仔生活費用。一鑽一線，一釘一捶(tûi)，補破孔thīⁿ裂紃，tìng後蹬，補破孔。
家私一大堆，tìng皮鞋底需要鐵釘摃槌仔，kap 彼台上重要ê皮鞋砧仔(tiam-á)，kā鞋套店鞋台，加真好做工課。因為學生有皮鞋mā有布鞋，所以阿伯mā-ē補布鞋，順紲賣鞋油、鞋帶⋯
下課時間，阮定定kap伊phò-tāu開講，阿伯lóng頭lê-lê，穡頭ná做罔kap阮講話。50外年經過，猶原懷念hit段日子，彼位砧皮鞋阿伯。