2015年9月24日 星期四

看相片回想人生_1959/8→1962/7中師51紀念冊(五):

看相片回想人生_1959/8→1962/7中師51紀念冊(五):
▲學習:
*有一工朱滙森校長來阮普三乙講〈 Khioh螺仔殼ê囡仔〉:有一个囡仔去海邊khioh螺仔殼,海邊螺仔殼真濟真súi,hit个囡仔講今仔日一定欲khioh一粒siāng-kài媠ê螺仔殼轉去做記念,伊ná行ná相,看著súi--ē螺仔殼to̍h khioh--起來 看看--leh,m̄-koh心肝內想講頭前面定著有閣較súi ê螺仔殼,to̍h tàn-sak手裏彼粒螺仔殼,繼續行繼續khioh,看若無kah意to̍h tàn掉,繼續閣再揣,心內充滿希望,一定ē khioh著一粒siāng-kài媠ê螺仔殼,khioh到日頭落海無khuàiⁿ人面,猶是khioh無一粒伊kah意siāng-kài媠ê螺仔殼。
校長講:未來恁出社會揣頭路抑是揣對象,to̍h kap khioh螺仔殼仝款,需要家己斟酌家己選擇,其實咱ê身邊時常mā有真súi ê螺仔殼出現,把握機會真要緊。
*幻燈機對焦點:老師指導幻燈機操作kap調整焦點。
*裁縫煮食:查某學生學煮食,學裁縫做衫褲。
*物理教室桌椅排疊是樓梯式,居葆輝老師上課kài認真kài心適,物理學識真飽,該實驗一定無tshìn-tshài,比手話刀增加效果,學生足愛上伊ê課,有一擺tshuā阮頂樓磚棚仔,教阮使用召鏡tiàu-kiàⁿ[望遠鏡]
*學珠算tiak算盤,hit-tsūn猶無電子計算機。
*畢業會考:集中大禮堂考試。


▲學習、休閒生活:
*教學大樓磚棚仔:想欲看較遠,peh上樓仔尾頂。
*勞作課:籐條拗羽毛球pue仔,竹管刻字,石膏模灌蠟做果子,線鋸做冊架仔⋯
*合奏:學樂器歕喇叭、彈ギタ-/gitaa/吉他練習。
*拍拳:扑拳頭,無leh賣膏藥。
*插花:查某囝仔學插花。



2015年9月21日 星期一

看相片回想人生_1959/8→1962/7中師51紀念冊(四):

看相片回想人生_1959/8→1962/7中師51紀念冊(四):
▲『師範學校vs 吃飯睡覺』:
食kōng-kōng、jiáng-kōng-kōng,讀師範學校to̍h是tsiah-nī好空,食便、穿便、睏便攏m̄免銅銑,唯一愛負責to̍h是kā冊讀hō͘ ka-nn̂g,將來出業「為人師表」「良師興國」tsiah-bē làu-khùi誤人子弟。
透早起床,飯廳食飯:
「bē tín bē tāng⋯」吵人眠ê喇叭聲已經tân,眠床頂做夢ê囡仔tsiâu振動,摺棉被、穿衫褲,落眠床趕緊去洗蕩。摺棉績被著摺像豆腐有鋩有角排整齊,洗蕩隨人去洗蕩間[盥洗室]抑是涼亭仔跤ê洗手台攏會使,穿插好勢上大樓『早自習』。
聽著食飯喇叭聲若響,跤步隨時徙振動,食飯--ò͘!攑箸kap湯匙入飯廳,飯、菜、配鹹已經拴便便,白米飯、魚臊逐頓有,斯當時,咱兜是無tsit款羹頓。飯頓公費開銷,服務每個月有伙食委員採買kap輪值同學phâng碗盤貯菜貯飯,食kōng-kōng、jiáng-kōng-kōng,to̍h是阮師範生。


▲勞動服務:德智體群美五育是師範教育目標,體育包含勞動做工,除了家己洗衫整理內務,有時總動員清理學校水溝、薅草、大摒掃,hām老師mā tshuā頭做hō͘阮看。
▲砧皮鞋阿伯:阿伯固定時間ē來宿舍洗蕩室邊--a修理皮鞋,1-kâi鐵砧仔1籠家私,bueh補bueh thīⁿ,抑是皮鞋底lak--去 ui--去,有阿伯服務,to̍h免煩惱,看阿伯tiām-tiām做工,有時阮ē kap伊開講,hō͘伊感覺khah-bē孤單。


▲學習:
△視聽教育:tī hit个年代視聽教育tng時行,老師教阮如何使用盤式錄音機,he是貴蔘蔘ê音響,學生幾若十个kan-ta 1台,聽罔聽,看罔看,ē-hiáu操作無hiah-nī簡單。
△軍訓:師範生相當高中生,安排有軍訓課,教官教阮攑銃弄銃花,sah~ húi!sah~ húi!to̍h是bueh thâi共匪,『殺豬拔毛』。
△校外服務:阮班bat去龍井國校蹛一禮拜,幫忙學校整理校園、製作教具、畫掛圖⋯家己煮食教室過暝,真好ê經驗。
△會考:師範3冬bueh出業,出業前學科總檢定,及格通過tsiah會得出業做老師,應屆畢業生集中禮堂考試,考啥乜已經bē記得,m̄-koh作文題目「海」記牢牢。好佳哉,學期頭有18工ê「環島教育參觀旅行」,tn̄g-tio̍h人生頭一擺看著闊莽莽ê海洋,驚奇特別濟感動特別深,tsiah有資料經驗kap感想,mā寫kah lò-lò長。



2015年9月18日 星期五

看相片回想人生_1959/8→1962/7中師51紀念冊(三):

看相片回想人生_1959/8→1962/7中師51紀念冊(三):
省主席周至柔,教育廳長劉真,藝專校長鄧昌國,東海大學校長吳德耀,作家張秀亞女士kap濟濟國內外專家貴賓來學校參觀、視導、演講。


▲康樂活動:
全部學生蹛學校宿舍,暝日做伙,鬥陣讀冊,同齊食飯,總舖相kheh,做伙tshit-thô、滾笑、散步、運動,親像兄弟姊妹。後生仔人上愛運動,姑娘仔趣味跳舞,下課後、食飯飽,運動埕一四界lóng是阮ê笑聲、大聲喝大聲hiu,啥乜齣頭攏總有。
△拍籃球上時行;踢跤球練跤力,罕罕--à tsiah有比賽;桌球to̍h是拍乒乓(phah-phîn-phông),老師一時手ngiau mā-ē展寶一tó͘勇,王夏民老師一直sàm[殺球],行路慢鈍ê劉志孝導師,一直khioh[接球],看伊uaiⁿh--leh uaiⁿh--leh mā是khioh ē著,結果強勢進攻suah輸保守ê守勢,為啥乜?技術問題--lah。排球mā是kài好耍,楊振川老師推sak六人制,ná像比九人制較有挑戰性,興拍球ê同學to̍h認真leh學。講kah tsiah-nī心適,無一項是我ê本頂,罕罕--à kap人插一跤,mā是看人蹤來蹤去ê kha-siàu。
查某學生較幼秀,m̄是散步講心內話to̍h是練習跳舞、彈琴抑是寢室內m̄出門。


▲土風舞,hit-tang-tsūn tng時行,m̄管查埔查某lòng tio̍h學,啥乜『跑跳步』、交換步、交換舞伴,有人跳kah sóng-uaiⁿ-uaiⁿ,我是跳kah hue-kô͘-kô͘,節奏to̍h是掠bē準,跤步ná像leh踏菜脯,好佳哉tsiok愛聽he外國土風舞歌曲,tsiah-bē感覺鬱卒,奇怪?興音樂卻是bē-hiáu跳舞,到今猶原想bē-tshun(tshia)?
學校有游泳池,熱--人泅水真正享受,人是泅kah笑hai-hai,我是仝款學bē來,真正運動神經有問題,只有欣羡怨嘆ê份。
斯當時學校管理真嚴,特別男女性別問題,猶是有hit-khuán男女授受不親舊觀念,m̄-nā班級分開,宿舍分開,食飯分開,連課外活動mā罕得lām-leh耍,若有he男女同學互相交陪講--兩句à,教官一定ē揣你問話。


▲校外活動:
參加台灣省運動會比賽kap大會體操表演;節日遊行se̍h街路由樂隊tshuā路;參加合唱團唱歌比賽。tsia-ê齣頭攏無我ê份。


▲校內音樂比賽:
師範三年hit一冬,ná像校慶兼慶祝新圖書館大樓落成,學校舉辦全校班級合唱比賽,暗時集合佇圖書館前舉行,比賽歌曲1條自選曲1條指定曲,指定曲是李永剛1960-05 《良師興國》(混聲四部)。
為著tsit場比賽,各班攏tsiâⁿ認真練習,指揮、伴奏lóng是家己來,輸人m̄輸陣,輸陣歹看面。」m̄-tsiah彼暗比賽tsiâⁿ競爭。
因為以班級為單位,hit條C大調《良師興國》阮kan-nā唱兩部,其中有1小段是Solo(獨唱),尾音iáu-siū-á kuân,是中央C高八度so͘ ê升半音,比賽一直進行,1班唱suah換1班上台,真可惜唱hit條《良師興國》無一班ē-tàng衝破高八度so͘ ê升半音,等到輪著阮普三乙,果然「不同凡響」,hit个Solo竟然完美唱出男高音,一時o-ló噗仔聲響遍暗夜,激出高潮,不過頒獎第一名m̄是阮tsit班,雖罔紲落去班級mā無kā tsit音唱起--去。
「蕭--e蕭--e!彼粒生雞卵無白hō͘你食--è,咱雖然無著第一名,m̄-koh轟動ê聲勢上感動人,多謝你!」比賽前許俊雄提一粒雞卵叫我生食落喉,講按呢ē-tàng唱出好聽歌聲。
故事猶未結束***************************************************************************一直到一直到出業教冊了後,同事mā是斯當時「男女授受不親」無相bat ê田中人張碧蓮老師kā我講:「你敢知,彼擺合唱比賽,阮查某班攏leh o-ló hit个田中人tsiâⁿ厲害,kan-nā我是戇大呆,kap你無熟似。」
哪會按呢,tsiah-nī奢颺(tshia-iāⁿ)ê代誌suah hō͘人o-ló m̄知,pì-sù ê人to̍h是按呢失去hiau-pai ê好機會。




2015年9月16日 星期三

看相片回想人生_1959/8→1962/7中師51紀念冊(二):

看相片回想人生_1959/8→1962/7中師51紀念冊(二):
▲1962年ê頭前門(大門):已經有圓形噴水池,教學大樓秀面tsiâⁿ-súi,lò-lò大王椰子增加氣派。
正爿:臺灣省立臺中師範專科學校。

倒爿:臺灣省立臺中師範學校。
應該畢業生有特師科2班,普師科男生5班、女生2班。


▲大樓前面秀面、噴水池、大王椰子kap斯當時真罕有ê南洋杉。大樓後壁秀面kap草埔。



▲工藝教室學剖爿竹管雕刻、線鋸、石膏灌模、籐ut羽毛球球桮⋯。音樂教室有兩間,一間學唱歌學樂理,一間風琴教室學彈風琴。
▲音樂教室。



▲游泳池,正爿是禮堂,對面是圖書館。泅水m̄是時常有,老師ùi頭殼浸水禁氣開始教,閣來覕落水底放輕鬆hō͘身軀自然浮,然後開始學泅。到出業,我猶學bē-hiáu換氣,kan-nā ē-tàng泅3-4公尺,有夠頇慢。
▲飯廳邊ê籃球埕,哈林籃球隊bat來訪問友誼賽。遠遠hit爿是運動埕,圍牆邊真濟欉榕仔。



▲新起圖書館:新式建築,螺絲形樓梯,大片玻璃窗,通風光焱(iāⁿ)。
▲圖書館會客室。



▲水塔。



▲禮堂:每禮拜一攑柴椅來tsia聽演講,暗會、書畫展覽tī tsia舉行,mā是落雨天ê室內體育場所。我ê入學考試考場to̍h是tī tsia。
▲禮堂舞台:bat tī tsia代表班級參加唱歌比賽,無著獎。

▲學生宿舍:ùi圖書館看過,攏總4落。



▲學生宿舍,第一落女生,第二落普師三年(應屆畢業生),第三、四落特師科kap師專。草坪kap醫療室。
▲飯廳kap灶跤:有空氣窗太子樓仔彼間是灶跤,後壁有大支煙筒。
食飯桌2條長桌合做伙,仝間宿舍學生大約14人做伙食飯,飯廳kài大間,飯桌分兩爿,中央通路囥大跤飯桶,方便行踏分菜、貯飯,男女分開,食飽碗箸隨人洗清氣phâng轉去寢室排好勢。
值星大隊長歕pi-pi-á『開動』了後tsiah ē使得食飯,有時菜色siuⁿ-bái,有人ē用湯匙仔摃碗摃碗公,表示抗議。

2015年9月13日 星期日

古物仔_囡仔時代記智篇_尪仔冊:陳慶芳收藏/蕭平治翕相

古物仔_囡仔時代記智篇_尪仔冊:陳慶芳收藏/蕭平治翕相
【回想--一下,幾冬前你耍過tsit款tshit-thô-mi̍h[玩具]?】
【古物仔是老人ê記智,少年人ê歷史。有記智ê人生,活teh to̍h有意義;有古物ê歷史,少年人to̍h-ē感恩siàu念。】
▲「囡仔人kap人leh看啥乜尪仔冊!」這是阿爸教示ê一句話,是好是bái難定論,因為有人看尪仔冊jia̍t-kah荒廢學業bē-tàng繼續讀冊,我是看siuⁿ過少尪仔冊suah欠缺真濟趣味kap智識。
做老師了後,知影尪仔冊是囡仔人課外ê好糧食,ē-tàng tām-sám ē-tàng開闊惱智,m̄-tsiah m̄敢siuⁿ過禁止學生囡仔看尪仔冊。
家己ê囡仔m̄知有偷看尪仔冊ê慣勢--bò͘? 我m̄知,我是m̄-bat禁止in課外看尪仔冊,甚至鼓勵in看 無要緊。
▲下面tsia ê尪仔冊,我 一本mā m̄-bat看--過。
△諸葛四郎〈大戰龍虎十劍士〉〈大戰雙騎士〉〈魔境歷險記〉
△(劉)興欽畫刊〈小八哥〉
△小學生畫刊;葉宏甲編畫










2015年9月12日 星期六

看相片回想人生_1959/8→1962/7中師51紀念冊(一):

看相片回想人生_1959/8→1962/7中師51紀念冊(一):
▲休學過後,重新ùi一年級讀起,hó-ka-tsài,阿爸已經知影我bueh轉去師範學校讀冊,將來bueh做老師。
9月1日轉來到學校,編入一年乙班學號8212,kā同學坦白休學原因,病情已經痊癒(tshuan-jú)bē穢--人,mā感謝同學諒解包容,ē-tit順序正常完成3冬學業,3年師範生活點點滴滴,簡要記錄tī畢業同學錄,經過53年歲月,tī tsia看相片回想人生,mā是kài心適kài有意義。
▲封面:烏tò͘紅絨布包裝冊皮
台灣省立台中師範學校五一級同學錄  朱滙森題。
畢業日期1962/07/31,是中華民國五十一年七月三十一日。



▲目錄、校訓、校徽。
▲簡史 校旗:1923/民國12年成立,1960/民國49年9月升格師範專科學校。臺灣省立臺中師範學校。

台中師範學校 校歌:
*紀念冊版本:
美麗之島,婆娑之洋,吾校聳立,氣象輝煌;百年大計,澤披四方,陶鑄師資,代有賢良;光華復旦,主義宣揚,莘莘學子,校訓勿忘;砥礪學行,不息自強,為人師表,邦國之光。
*在校3年教唱版:改「玉山峰高,濁水流長」兩句,kài有在地味。
玉山峰高,濁水流長,吾校聳立,氣象輝煌;百年大計,澤披四方,陶鑄師資,代有賢良;光華復旦,主義宣揚,莘莘學子,校訓勿忘;砥礪學行,不息自強,為人師表,邦國之光。
▲朱滙森校長真有親切感,kah意親近學生,常利用班級自修時間kap學生phò-tāu,講古講人生道理。每禮拜一頭2節課延續前任黃校長規矩,聘請名人教授來演講。



▲前任校長黃金鰲較嚴肅,罕得kap學生開講,徐教官是伊ê助手,學校規矩交代徐教官to̍h處理kah好勢好勢。時常邀請教授名人來學校演講,每禮拜一頭2節課to̍h是攑椅仔去禮堂聽演講時間,得著真濟做人處事智識。(休學hit年ê校長)
▲敬愛ê師長:揀幾個較有記憶ê老師紹介。
*戴鎬東:教阮寫毛筆字攑筆『懸腕』方法,啥乜是中鋒、逆鋒、藏鋒。(休學hit年導師)
*劉志孝:導師,無為而治,放阮自由發揮,所以阮班特別活kioh。伊教「國語」課tsiâⁿ趣味,採用點名方式,叫學生家己唸家己ê姓名,有tîng-tâⁿ繼續唸,唸到老師滿意為止。輪著同學『陳春男』,3字發音包含ㄔkapㄋ,結果唸做「tshn̂g tshun lânㄘㄥ ㄘㄨㄣ ㄌㄢ」;『周照雄』koh-khah歹唸,「租走松ㄗㄛ ㄗㄠ ㄒㄧㄥ」,實在tsiâⁿ笑詼,結果阮ê北京語mā無較進步。
*王靜珠:教育輔導,真有愛心ê教育家,看待學生親像家己ê囝,bat去in-tau tuà暝,食老師煮ê早頓,綠豆牛奶糜(muâi)配饅頭。
*王之儀:健康衛生,真有愛心,看待學生親像家己ê囝。伊ê查某囝叫『小七/任素英』,附小試教ê學生,讀二年級,真古錐,時常去in眷村行踏。
*饒朋湘:教育心理,教冊足認真,偉大教育家。
*葛道明:參觀實習,少年老師,tshuā阮參觀試教,環島旅行,增加教冊功力增加教育智識。
*徐敏教官:認真負責軍人,有善良心腸,大嚨喉孔,卻是體諒學生愛護學生,破病時陣hō͘伊鼓勵關心真濟。
*呂佛庭:國畫,偉大畫家,修養足讚,無修伊ê山水畫真無彩。老師單身蹛學校宿舍,bat去伊ê房間,聽伊講伊ê畫開始進入抽象階段,kā宣紙坦橫舖tiàm桌頂,墨、筆準備好勢,開始靜坐(坐禪),心中無意無念,等到一个時間點,目睭小可peh金,大毛筆搵淡墨tiàm紙面隨意畫隨意撇,然後宣紙掠坦直,直覺山水、花鳥抑是人物,決意了後,攑小毛筆搵烏墨,隨意點隨意撇,隨時一幅抽象國畫完成。
*林之助:西畫,東洋畫是伊專長。上伊ê課趣味輕鬆有內涵,得著真濟畫圖技巧、理論。老師是ná講ná畫,講煞畫完,隨了解老師leh講啥。伊講人ê標準體格是八頭身,畫一條直線平分八份,先畫一粒頭殼佔1份,看起來ná竹篙ná lò跤鬼,八頭身ná有可能是phiau-phiat體格?ná講ná畫,講煞畫完,「ua̋!莫怪西洋人體格tsiah-nī phiau-phiat英俊!」有一擺,拜一聽完教授演講,下晡第一節課,老師入門,白墨攑--leh,畫1粒頭殼,簡單喙目鼻,閣再喙下斗點幾若點,無夠半分鐘,學生同齊喝聲「侯潘,侯潘教授!」驚奇佩服寫tī面。
*陳朝陽:音樂,第一學期教阮風琴指法,檢定6曲算通過,第二學期愛ē-hiáu彈有伴奏30首囡仔歌,眾學生煩惱kah,單單我m̄驚,因為我有撇步,135、725、146倒手ê和音已經瞭解ē-hiáu應用,果然過關。真正bē博假博bô-khah-tsua̍h,此後風琴指法無koh進步,到今猶是「無師自通」hit幾步,怨嘆老師無認真教?怨嘆家己無骨力學?
*居葆輝:物理,有夠趣味有夠心適ê上課,老師物理學真飽,教冊心適活潑,該實驗一定無tshìn-tshài,比手話刀增加效果,學生足愛上伊ê課。有一擺我問老師一个戇問題,suah去hō͘我問倒--去:「老師,請問,天頂ê火金星,是星光走來hō͘我看--著,抑是我ê目睭走去kā伊看--著?」一時老師suah bē-hiáu應話。
*李存祿:地理,學生攏尊稱伊是「地怪」,上伊ê課需要先自修,課文內ê疑問做你問,問到無問題,換伊kā阮考試,真làu-khùi,見擺hō͘伊問--著攏零分。有一擺,伊問「台灣ê小麥是冬麥區抑是春麥區?」逐家回答伊攏無kah意,尾仔kō͘攑手表決,逐家攏贊成是冬麥區,單單我無攑手。老師問我答案kap理由,我講:「春麥區。」為啥乜?「因為台灣冬天氣候kap中國長城以南差不多,所以屬春麥區。」老師教ê地理屬自然地理,有一擺講著台灣ê『菠蘿』,伊to̍h喙笑目笑講:「原來台灣ê王梨是生tī樹仔尾頂!」害阮笑一下險險仔落下頦,老師掠林投果實是王梨--lah。
*楊振川:體育,老師是6人制排球ê推sak者,hit-tsūn ê排球時行9人制。
*金鴻儒老師單身tuà校舍,hit-tsūn時行ラヂヲ/rajio/收音機轉播籃球比賽,bueh睏進前,真濟學生tiàm窗仔門邊聽轉播。
*陳老師:教育概論,「我是高考及格」是老師自我紹介第一句話,m̄-tsiah逐家對伊印象無好,我想,伊是leh kā阮鼓勵,讀師範mā ē-tàng出脫,認真phah拚,高考及格to̍h ē使得轉來母校教冊。
*岳老師:教材教法,坐tiàm講台頂看冊唸課文hō͘阮聽,話母『這個 這個』特別濟,有同學bat kā算,一節課攏總講50幾擺。
*劉秀蓮曾碧雲:護士,tsiâⁿ負責任,對學生真親切,身體欠安hit-tsām,受in照顧真濟,時常拜托in注射ビタミン維他命綜合B。
*聽同學講ê:有兩个查某老師,一直交代女同學m̄-thang嫁hō͘男同學,看bē起做老師ê男同學。





2015年9月10日 星期四

19450300_四兄 ê修了證書kap思ひ出:

19450300_四兄 ê修了證書kap思ひ出:     Lah-jih_20150825
四兄ê畢業證書,已經保存70年久,猶原新tshak-tshak,表示四兄gua̋-nih寶貝tsit張文書。四兄出世佇日本時代,讀冊佇戰亂時期,覕防空豪,實在m̄-tsiâⁿ讀,m̄-tsiah大漢了後to̍h綴大兄去阿里山林場做集材工仔,扞機器、鉤柴、運搬、記賬攏ē-hiáu,是大兄放心ê助手。5个兄弟to̍h算四兄上古意老實,m̄-bat看伊kap人冤家相罵,bē-hiáu講白賊話,m̄-bat--人,除了pok薰以外,lim酒、跋筊是真罕得有--ē,食穿真tshìn-tshái,做人翹攲,人人好人人呵咾。因為有4位兄哥kap 4位阿嫂疼惜照顧,Lah-jih tsiah有才調佇社會徛起,做老師教育學生,兄哥疼小弟,小弟尊敬兄哥,5兄弟感情ê好,無人ē-tàng比並。今,四兄功德圓滿m̄ kap人間續緣,小弟珍惜tsit段因緣,永遠ē記得兄弟感情歡歡喜喜,願 四兄離苦無憂歡歡喜喜行向極樂世界ê彼爿岸。阿彌陀佛!(2014823農曆728日記念文)
▲四兄出世tī昭和年(1932),昭和二十年三月田中國民學校卒業,出世tī昭和十六年(1941),四兄加我九歲,伊國民學校卒業時,我猶未四足歲,米國B-29當leh爆擊掃射,五日節前一工ī--ā to̍h來往生,連做司公超渡功德都因為掃射煞來中斷,真正不幸bô-siá-sì ê年代。
讀過六年國民學校ê四兄,實在有夠頇慢,m̄-bat聽伊講過一句日本話,阿爸tī--leh ê時,to̍h bat按呢講:「講kah tsit-ê Kiâng--ē--ho͘ⁿh,有夠頇慢,讀六年冊,kan-nā bat-tī暗時叫伊起來放尿,眠眠kā我應一句 なりか?」
Tsit張 修了證書 除了色水變黃以外,kui張無缺角無bak烏假若新--e,ē-tàng了解四兄寶貴珍惜ê心思。




▲《思ひ出》:
這本卒業記念冊,四兄保存kah好勢好勢,驚做phah-m̄-kìⁿ,10外年前提出來hō͘我保存,ùi這本《思ひ出》ē-tàng hō͘咱想起70年前田中國民學校ê記智,kap我60年前印象精差無外濟,仝款校門,仝款教室,仝款辦公室,仝款禮堂,只是樹木有較大欉。
學校門tsiâⁿ媠,叫做まなびやの門,學校門正爿有3棟教室,包含現此時ê網球埕kap徛家厝;學校門入--去正對面是辦公室,辦公室兩爿lóng是教室;辦公室南爿一間福利社,koh過是禮堂,禮堂兩爿是教室;koh南爿是運動埕;運動埕東爿是魚池,西爿有xx室?南爿有兩棟教室,閣過to̍h是田地,校園不止仔闊。上南爿hit兩棟教室,1955年割hō͘ ta̋ⁿ成立ê田中初中做教室。
△冊皮:
皇紀二千六百五年 昭和二十年三月 田中國民學校
《思ひ出》(思想起 卒業紀念冊)
初等科第三十一回(5班)高科第二十一回(1班)
△這屆卒業生是日本教育上尾屆。
△學校門:山口校長先生、校旗、まなびやの門。




皇紀二千六百五年 昭和二十年三月,是1945年3月,已經是日本時代尾期,mā是皇民化ê尾聲,田中國民學校日本教育ê結束。
△方先生:教師名單kap寫真しゃしん[相片]
除了山口校長先生是內地日本人以外,台灣籍ê查埔老師有21个,查某老師有14个,改換日本名有12个。
我熟似ê老師有:魏朝其、黃木杞、黃龍江、蕭向西、陳百年、中山紘一(孫水波)、鄭來生、田川達三(陳允成)、陳時英、許金潭。




初等科第三十一回卒業有5班,計共查埔學生208人,查某學生95人,改換日本名有11人。ē-tàng看出斯當時男女教育ê差別是2:1。
一組男58;二組男62改日本名2;三組男61改日本名1;四組男27女33改日本名2;五組女62改日本名6。計共:男208女95改日本名11。
△初等科第六學年一組學生名單kap寫真しゃしん[相片]



△初等科第六學年二組學生名單kap寫真しゃしん[相片]



△初等科第六學年三組學生名單kap寫真しゃしん[相片]
第五排→第8个穿烏色是四兄蕭順強。我熟似--ē有:蕭賜源、林子昭、魏慶木、陳見仁、孫國華、蕭永賢。



△初等科第六學年四組學生名單kap寫真しゃしん[相片]



△初等科第六學年五組學生名單kap寫真しゃしん[相片]



▲高科第二十一回卒業1班,計共查埔學生49人,查某學生10人,改換日本名有4人。
△高等科第二學年學生名單kap寫真しゃしん[相片]
第五排→第五个是Chiu-á兄蕭有朋,穿烏色。

▲田中國民學校早期ê寫真しゃしん[相片]

Download:臺灣國定古蹟編纂研究小組(National Historic Monuments of Taiwan)相片
Tsit張相片ê年閣比《思ひ出》校門閣較早,形體仝款,只是樹木較細欉。圍牆頭前空地tú好是現此時徛家ê涼亭仔。



▲學校簡史:引用田中國小學校校刊的介紹
田中公學校創建於1914年(日大正3年),今年剛好創立滿第100週年。本校創立於民國三年四月一日。由二水公學校分教場正式獨立。定名為「田中央公學校」。校址設於田中鎮南路里現址。十年四月,改稱為「田中公學校」。十二年四月,增設高等科教育,廿八年四月,分設內灣分教場,卅年四月,內灣分教場獨立,本校改稱為「田中國民學校」,同時再於三潭地區分設「田中北國民學校」。
光復前歷任校長為杉本先生、今仁義記先生、市田清五郎先生、川村秀德先生、山口勝利先生。

卅四年十月,台灣光復,本校改稱「田中第一國民學校」。並廢除高等科教育。卅八年一月,附設幼稚園。卅九年九月,分設三安分校。四十二年九月,三安分校獨立為大安國民學校,而本校再度改稱為「田中國民學校」。五十七年八月,改革學制,實施九年國民教育,廢除附設幼稚園,校名亦改稱為「彰化縣田中鎮田中國民小學」。六十六年九月,設置特殊教育「啟智班」,七十二年九月,再附設幼稚園。七十九年九月,奉令附設「民眾補習教育」班,教育逾齡失學民眾之補習教育。八十一年八月,再於彰化少年輔育院附設「補校分校」,教育少年輔育工作,八十五年八月一日設置「資源班」。