老歲仔團湘西張家界9日遊----第九工：

老歲仔團湘西張家界9日遊----第九工：
昨暗半暝tsiah睏，今仔日9點tsiah bueh出門，bueh遊珠海漁女；石溪公園；石景山公園三个所在，然後離開中國到澳門坐19:05飛龍機轉去台中機場。
珠海漁女是珠海海灣景緻，有1仙漁女石雕，是珠海市標誌，落車後隨人家己se̍h-se̍h看看--leh，約定半點鐘後原位上車。毛毛仔雨，攑雨傘行--過去 koh行--倒來，tú好上車時間，peh上車頂，一位鄉親ò͘ⁿ-ò͘ⁿ-jiáng，也緊張也受氣：
「明明講原位上車，suah徙來tsia，害我揣kui半晡⋯」，
鄉親--à！車無徙位--lah，是你家己⋯
「kâ 騙，騙hiah-ê mo͘h鼻--ē，明明徙位m̄-tsiah揣無，m̄-thang按呢生--lah！」
鄉親已經gông路站去--à，地頭無熟，越一下頭，彎一个斡，東西南北分bē清，to̍h按呢行m̄著方向，莫怪迷路。sian講mā bē-tshun-tshia，算是笑談一層。
石溪公園是市區公園，看看行行--leh，當做散步，樹木真ōm，閣有趣味心適石雕。
上尾一个景點石景山公園，需要門票，ē-tàng坐流籠上山頂kap落山，he流籠是簡單型，bueh坐著兩个大人tàu跤手，幫你坐上座位，淡薄仔無安全感。ùi山頂ē-tàng看真遠，香港、澳門、珠海to̍h-tī對面，有山有海景色súi。
結束所有景點，閣來to̍h是出出入入走三國，ùi中國珠海出關、入關到澳門，然後ùi澳門出關到機場坐飛龍機。6點進前到機場，歡歡喜喜聽候bueh坐7點5分班機。一般情形，tī起飛前1點鐘內入去候機室，siáⁿ知已經6點半無動無靜，等到bueh 7點tsiah聽著廣播「時間慢分，請先去領便當べんとう食暗頓。」一時間議論紛紛，m̄知啥乜原因，有人kap櫃台ò͘ⁿ-ò͘ⁿ-jiáng會bē清，
「台灣天氣無好m̄敢飛？」
「人客傷少無bueh飛？」
「無了解？m̄知影？？？」
導遊建議先去二樓餐廳食暗，tshóng-tshóng-pōng-pōng、來來去去、peh上peh落、趕緊食飯⋯
Iân-tshiân點外鐘久，導遊喝聲趕緊集合--ò͘，tit-bueh坐飛龍機--a！
登機後tsiah知，原來是bueh轉機，m̄是澳門直飛台中，是澳門飛桃園，是大pang--e，人客真濟。安穩夜間飛行，到桃園機場，航空公司隨安排bus專車送阮到台中機場，然後tsiah-koh轉彰化來接ê bus轉去彰化，1團41隻鴨仔沿路放粉鳥，放到田中(Chhân-tiong)厝兜，看手錶是天光日透早3點。
今仔日1工變兩工旅遊，加食人1頓飯，飛龍機閣坐較久，閣有專車服務，真正趁著--à。因為加趁1工，9日ê旅行pìⁿ-tsiâⁿ 10工，無加錢銀，真正是趁--著。
【後記】：
1、Tsit-tsuā遙遠路途對我來講，是真tsán ê經驗，新个地頭，新个體驗，增加見識。不過1擺to̍h好，m̄-thang第二遍。
2、克復家己畏出門ê無奈，除了藥物、紙尿褲護身，tio̍h-koh隨時斟酌身體狀況，m̄敢烏白食物，隨時關注情緒，mài緊張bē受氣，時時刻刻安住內心。
3、控制家婆個性，關心家己關心牽手上要緊，聽導遊ê話，綴人行踏，遵守時間，tshun--e著盡量mài kap人會kap人花，mā mài有--ē無--ē phah-la-liâng。
4、有斟酌無緊張，有準備無使用，有使用無漏氣，有互動無爭論，有眼、耳、鼻、舌、身、意，無執著。
5、總--是出國9工平安順事歡喜轉--來--à。

△珠海漁女，落雨答滴，雨傘滿滿是。

△遠遠hit仙to̍h是漁女，伊ê翁婿tī對面。

△石溪公園ê美女。

△石溪公園ê石雕。

△石溪公園有流水有樹木，好散步。

△石景山公園 漁夫海鵬。

△漁夫海鵬，to̍h是漁女ê翁婿。

△石景山公園坐流籠 自翕。

△to̍h是tsit款流籠，視線較好，感覺ná鳥仔leh飛。

△石景山公園山頂。