看相片回想人生_1965/10→1968/10_三冬兵役(三)新兵訓練：

【看相片回想人生，是leh描寫Lah-jih ê記智，mā是leh紹介70外冬來ê生活一點一滴，講古兼敨放心思。】

看相片回想人生_1965/10→1968/10_三冬兵役(三)新兵訓練：
▲孫文百年冥誕：
11月12日是孫中山(Sng Tiong-san)逝世記念日，1965年11月12日是百年冥誕，黨國無分ê時代，特別佇斗南(Tā-lí-buh)舉辦慶祝大會，空軍新兵訓練中心軍樂隊擔任大會樂隊。
大會樂隊除了大會奏樂，koh-tio̍h 𤆬隊se̍h街，se̍h街隊伍上頭前是1台jì-phuh(吉普)指揮官開路，紲落去to̍h是大會樂隊，隊長後壁to̍h是有「空軍新兵訓練中心軍樂隊」隊旗ê鐵琴，攑鐵琴摃鐵琴對我來講，是一種考驗：
生手摃鐵琴，我用偷食步，倒手攑琴，正手比一个樣，綴ē著--è摃出聲，綴bē著--è放伊過，鐵琴ê聲音輕輕khiang-khiang，有聲好聽，無聲無妨害，有ná無，無ná有，少人ē去注目琴手ê動作。
樂隊se̍h街隊伍需要變化隊形，有淡薄仔複雜，其他隊友lóng是láu手，隨練習隨滑溜，隊長kā我m̄免驚，綴伊跤步後壁行to̍h無問題，別人著交叉換位，kan-na鐵琴kap隊長ē-tàng直直向前行。好佳哉，無làu-khùi，『雄糾糾，氣仰仰。』siâⁿ人目睭看對阮tsia來，雖罔人材有較小細，徛tī中央tsiah是注目ê一个。
△軍樂隊：顧英哲、李正福是師範同學，陳河安是田中鄉親。中央是蕭平治，頭前囥大鼓、鐵琴。

 ▲感覺hiau-pai，教官允准阮去寫真館翕相留念，『英俊瀟灑』。

▲11月12日孫文百歲慶祝大會tī搭里霧(Tā-lí-buh(雲林縣斗南)，擔任大會軍樂隊，翕相記念。

 ▲『英姿煥發，雄糾糾，氣仰仰。』人食妝，神重扛，一點仔to̍h無錯。







































▲榮團會：肝膽相照
也m̄是ài-iāng，也m̄是假gâu，無代無誌hō͘人推薦做榮團會主席，臨時臨iāu叫我主持會議，tse實在m̄是我ê kah意，ē記得連啥乜是「榮團會」啥乜是「肝膽相照」都解說kah無路理來，siáⁿ知2點鐘會議結束，suah得著連長o-ló kah觸喙舌，kan-na小可訂正主題ê含意。
▲班長𤆬隊考試：
Tsàm跤步基本操練班長是一位老胡仔，性地tsiâⁿ好有愛心，有一工kā阮測驗，tī一个籃球埕闊ê場地，叫阮tshuā班兵行路，限制『齊步走、向右轉、向左轉、向後轉、右轉彎、左轉彎、向右轉走、向左轉走、向後轉走』各發出2擺口令，bē使得加bē使得減、bē使得行出範圍，結果kan-na我及格通過，tshun--e 2-3下口令to̍h行出範圍，m̄知按怎喝倒轉來--à！老師做3年，真正m̄是做假--è。
▲拷phē-á kap野戰訓練：
To̍h是『打靶』--lah，技術bē見眾--得，tsit種有危險ê銃枝，雖罔學校bat摸--過，真正ē-tàng彈銃子ê武器，我是安全第一，「驚驚bē著一等」，當然成績無懸。人講空軍是少爺兵，拷phē-á機會m̄是kài濟。
結束新兵訓練進前有比較較ngē-táu ê野戰訓練，全身武裝過五關，覆地nǹg塗跤，無銃聲，soh竹篙仔，tìm手雷彈⋯，總講一句，跤力算bē-bái，展手技手尾力實在有較頇慢，總--是也是過關，結束將近2-kó͘月新兵訓練。
▲抽籤分發部隊：
最後1工，行李款款--leh，集合tī司令台前等分發，籤仔1支1支抽，通訊兵、高砲兵、警衛兵一直出現，到kah落尾抽2支衛生兵，一个是邱勝夫，一位是蕭平治，隨時有一位空軍中校軍官tshuā阮起行，坐軍車換火車，除了邱勝夫、蕭平治，猶有3个m̄-bat同志鬥陣相伴，tu-tu tshiàn-tshiàng、tu-tu tshiàn-tshiàng，khi-khi-khok-khok、khi-khi-khok-khok向北行。