看相片回想人生_19690212_結婚前一工：

【看相片回想人生，是leh描寫Lah-jih ê記智，mā是leh紹介70外冬來ê生活一點一滴，講古兼敨放心思。】

看相片回想人生_19690212_結婚前一工：
▲「有錢無錢，娶某過年」，窮實m̄敢家己講tsit句話，3冬兵役關餉無夠用，tio̍h-koh kā兄嫂tshun長手，現時橐袋仔袋磅子ná敢講bueh娶某，結果阿兄做主決定都已經kâng硩定，過年前無娶入門敢ē使得。
訂婚到結婚大約kó͘外月，結婚前ê準備khang-khuè一大堆，錢ê部份兄哥負責，tshun--e to̍h是新郎我發落籌備。
Kā護龍尾hit大間房隔做兩間，一間人客間，一間新娘房，倩厝邊敆作師傅邱清秀來隔間phah眠床，壁堵油油漆漆--leh，空位to̍h等新娘ê嫁妝柴頭木橛來排疊妝娗。
新郎穿插囝婿衫ê備辦，硩定女方ê回禮已經tsuân便便，白色しゃつ 、金色カフスボタン[袖釦]、紅色ネクタイ 、烏皮鞋皮帶，猶有一塊港貨西裝料，未來牽手講伊bueh親手做。
請帖，時行tī食頭路人同事、朋友、同學，厝邊隔壁、tshin-tsiâⁿ m̄免，所以街路買便--ē轉來寫好，1禮拜前郵局寄--出去to̍h完成。另外遠路tshin-tsiâⁿ著進前親身去kâng tshuā(請)，彼陣少人有電話，連絡著靠鐵馬抑是步輦。
訂婚後大兄in又閣去阿里山做工趁錢，著等結婚前tsiah-ē轉--來，大兄轉--來是真重要，娶新娘請人客備辦ê禮數禮品kap料理作料，攏著錢項箍箍仔，大兄猶未轉--來實在ē緊張，總舖師Kiû-á兄滾笑kā我講：「大陣會仔kā標--落來to̍h有了了，ná著煩惱。」m̄-bat份會仔suah毋知影啥乜意思，戇大呆一个。
▲「娶某前，生囝後」是講運氣ē特別好，我ê娶某前一工是特別無閒，家己寫柱聯，家己發落公媽廳吊囍帳、囍聯，囍聯ê吊掛順序bē使得出tshê，尤其是母舅一定著囥大位，暝時koh-tio̍h斟酌囍聯頂面ê銀票；厝邊隔壁相爭過來tàu跤手，挨粿、挲圓仔、揀菜、洗東洗西逐家做伙來；總舖師Kiû-á兄是總指揮，有人起灶借鼎鍋、碗箸，烏狗做採買，街路kam-á店先賒m̄免付現金，暝時總舖灶著愛顧，有人滾笑創治講「新郎家己顧to̍h好」；彼暗頓kan-na tàu跤手、tshin-tsiâⁿ、厝邊頭尾to̍h辦8-9桌，八仙桌kap椅條是新郎我親身厝邊隔壁借kap夯，明仔載ê正式食桌to̍h需要街路kā人稅。
▲訂婚聘金斯當時萬二、萬六有人送，三萬六、六萬六閣較有體面，散赤人m̄-koh是做老師，無thang大路大出手mā m̄-thang siuⁿ hân-san，to̍h送16000新台票，koh遵照女方建議kā「世華西裝社」對面厝邊「富香珍」注文酥餅100塊，禮餅36塊。
△1969年護龍頭舊厝猶原竹管厝khàm稻草，隔壁木聰--e、林仔姆、隔壁Phang--e、對面再添仔嫂kap查某孫仔素珍，逐个無閒tshih-tshih會東會西。

△椅頭仔頂khuè kám-ô͘，囡仔看鬧熱，查某人leh搓紅圓，四兄今仔日已經穿kah足整齊，喙 文文仔笑，巡頭看尾，歡喜小弟娶弟婦仔。

 ▲頭前埕護龍10年前起ê磚仔瓦厝，oh尾間to̍h是新娘房，瑞恭 猶未讀冊，tsit-má已經50外。厝後ē-tàng看著竹模是刺竹，傳統竹模厝宅猶有一个型。

 △今仔日來一个不速之客，tuà和美ê師範同窗張仕良提早一工來，ing暗to̍h招伊做伙睏新娘房，傳統風俗，新娘房m̄-thang孤人睏，tio̍h-ài睏一雙，雙雙對對tsiah-ē萬年富貴。
閣來to̍h是期待明仔載娶新娘ê齣頭，充滿期待向望。