2016年7月31日 星期日

20160705_阿公阿媽夏令營(第二工下午):

20160705_阿公阿媽夏令營(第二工下午):
下晡行程是參觀阿公祖家崁頂庄:
崁頂庄是祖先徛起ê開基地,阮tau有文字記載歷史有300冬,tuà崁頂庄ê年閣上少有200年,這有《崁頂蕭姓肇基祖朝宰公世系大房廷光公派下家譜》記載,Lah-jih出生地當然需要紹介hō͘孫了解,我mā知,1-2點鐘ê行踏無thang記智偌濟,總--是有跤跡to̍h有記智,未來有一工,兩个孫若bueh了解自身身世,定著加真容易了解。
▲車停tī厝後路邊,thiau-kang tshuā in ùi庄頭行入,ná行ná講,tn̄g-tio̍h族親著稱呼著教in叫阿叔阿嬸阿兄阿姊,因為我輩份大,bueh叫阿伯阿姆伯公嬸婆--ē,suah無tn̄g--tio̍h。
崁頂路kā庄頭分做兩爿,東爿西爿有水溝為界,阮to̍h一條路行過一條巷,『阿公,怎住這麼擠?
「著--ā!tsia是庄腳,全庄大部份攏姓蕭,都是族親--ō͘!」
『阿公小時候可以pha-pha走!』
著!阿公宿題若寫好to̍h四界tshit-thô,去做店仔撐(tiàm-á-thèⁿ)承話鬚。意思to̍h是講去拄才咱去買飲料ê店仔,聽大人講話,ē-tàng學著真濟知識和做人道理。
『阿公很愛玩又很會讀冊。』著--ā!認真讀冊m̄-tsiah ē-tàng做老師。
來到蕭--姓祖厝〈書山祠si-san-sû〉,教in入去內廳拜祖先,然後來到役會,tsit-mái ê活動中心,看著壁頂一幅敬老邀請四句連,有寫蕭平治撰,孫--e問講he阿公寫--è--hio͘h?
字m̄是阿公寫--è,四句連是阿公ê文章,in聽kah真歡喜。閣來參觀「晉天宮」,kā in講這是歸庄ê信仰中心,最後tsiah tshuā in轉來到家己ê厝宅。
每年過年日一定tshuā in轉來拜祖先,kap兄弟叔孫熟似,雖罔m̄是kài熟,mā無生份,入大門口特別紹介,阿公囡仔時代,厝圍lóng是刺竹模,1模1模連做伙,叫做「竹模厝地」,頭前埕正身有公媽廳,後壁埕正身mā有公媽廳,咱tī後壁廳拜公媽,he公媽牌是代表咱ê祖先神位,年節攏著拴禮物虔誠拜公媽,咱tsit-mái 雙手合十kā公媽請安to̍h好。恁看壁堵有tsit-kâi像框kap咱兜仝款,he是咱兜ê寶貝文書,記載200年300年ê蕭--家歷史,等恁較大漢,阿公tsiah講歷史hō͘ lín聽。『阿公!好的!』
咱兜mā有一本《崁頂蕭姓肇基祖朝宰公世系大房廷光公派下家譜》,以後一定愛研究--一下,了解家己祖先ê歷史,了解家己是啥乜人?
《崁頂蕭姓肇基祖朝宰公世系大房廷光公派下家譜》


▲公媽廳服祀神明kap觀音漆仔。

▲公媽廳,正爿祀神明,倒爿祀公媽牌,tn̄g-tio̍h過年,几桌(kí-toh)頂囥白米飯插飯春,發粿mā有插飯春,年年發年年春(tshun)。

▲田頭看著ê phòng-phuh-á(ポンプ/pompu/手動抽水機、幫浦。水挾仔)

▲望高瞭(bāng-ko-liâu)向東看著是八卦山脈,上懸所在叫做gû-kak-niah,tsit-mái講做牛犅嶺。(牛犅gû-káng。公牛。)

▲tī人兜看著ê抱囝椅phō-kiáⁿ-í/ 新婦仔椅sim-pū-á-í。

▲家己厝內ê洗衫枋。

▲古早傳--落來ê石磨仔,已經退休khǹg tī壁角。

▲庄內看著ê竹管厝kap篾仔壁堵,khōng水裙。




2016年7月19日 星期二

20160705_阿公阿媽夏令營(第二工上午):

20160705_阿公阿媽夏令營(第二工上午):
按計畫今仔日頂晡bueh行八卦山脈田中鼓山寺到社頭清水巖ê步道,這是一條產業道路整理ê步道,因為佇無kài-kuân ê半山腰,規山坪kài-tsē相思樹,兩爿樹木ām-ńg,日頭光tshiō入bē熱,來tsia散步ê人真ka-ia̍h,路邊野花野草蟲豸鳥隻真濟,是讀冊囡仔ê活教材。行tsit-tsuā步道除了訓練囡仔跤力koh ē-tàng學著真濟物件。
1986年7月21日,韋恩風颱特別ùi濁水溪出海口掃入--來,濁水溪埔kap白波波ê平洋,無山nâ截,suah  hō͘田中社頭ê八卦山相思仔林掃kah東倒西歪,風颱後有生理人bāu剉倒欉相思樹,siáⁿ知連無倒ê大箍大欉--ē mā順紲剉,為著剉tsiah-ê相思仔,to̍h開一條產業道路,尾仔tsiah整理做鐵馬路散步步道。
9點跤兜載來到山跤普興庄文武廟,kā車停tiàm tsia開始向北爿清水巖行tsiūⁿ山路,無崎無平起起落落,因為是禮拜二人較少,阮勻勻仔行,ná行ná交代囡仔斟酌看,感覺稀奇趣味--ē to̍h kā翕相,囡仔家己有手機仔,翕相無問題,問題是教in著ná翕ná聽阿公阿媽導覽。遊覽kap導覽無仝,遊覽是『走馬看花』影--leh 影--leh,導覽著斟酌詳細看koh-tio̍h問問題聽說明。
看著刺竹模,阿公講he是古早阿祖tuà竹管厝ê材料,看著較大葉ê麻竹欉,阿媽講he是縛肉粽ê粽箬仔,囡仔愛食阿媽縛--è米粽,感覺真有興趣。看著姑婆芋in知影名,m̄-koh m̄-bat看著tsiah大遍tsiah大葉閣有開花ê姑婆芋,趕緊kā說明講這叫做「植物群落」,in mā隨時翕相記錄。
繼續行繼續看,kuè-niau-á植物、開花結籽ê硬桃[月桃],飛來飛去ê蝶仔、吊絲線ê蜘蛛kap蜘蛛網,石頭gih ê石頭岸,hō͘ in看kah心適koh趣味,其實阿公內心知知,講he台語是聽無2成,總--是有聽to̍h有記持,有看to̍h有濟少認bat,阿公阿媽阿孫感情互動tsiah是重點,有歡喜to̍h有收成,大漢孫koh ē-hiáu寫fb,同學看著定著真欣羡,未來台語ê學習保證有幫贊。
行來到一个坑門,tsiah知日頭赤iāⁿ-iāⁿ,趕緊翕一張相to̍h tiàm觀景台小歇睏,lim水食點心,行bueh點半鐘來到清水巖地界,看著無仝ê植物,狗尾仔草kap龍眼仔欉閣有生龍眼,原來龍眼仔是生做按呢生,來到生物館,無人紹介,家己簡單導覽,真濟筍龜(獨角仙)、杜定、蝶仔、蛾仔⋯真濟蟲豸標本,算是hō͘囡仔大開眼界,紲落去參觀清水巖古蹟,簡單說明宗教信仰ê風俗。
時間已經過晝,有朋友好心載阮去鼓山寺步道起點hit爿,to̍h-tī路邊飯店食晝,然後ùi起點行到文武廟,tú好完成tsi̍t-tsuā路程。

△步道樹木ām-ńg,散步好所在,因為有真濟外位來ê退休人客是散步常客,有人供體號做18%步道。











△看著奇巧,to̍h是愛翕相,阿媽tiàm邊--a說明。











△大漢--è認真翕相,細漢--èmā認真欣賞,肉粽箬仔----麻竹葉仔。












△tsia是山坑仔門,無樹蔭,天氣ná火燒埔。












△景觀台小歇睏,看--起來 m̄是kài-thiám。















▲昆蟲館參觀標本,he蛇kap蜈蚣ê標本,細漢--è小馬鈴(薯)講伊m̄敢看。












▲這to̍h是龍眼仔欉,閣有生龍眼。



▲姑婆芋ê葉仔足大葩足súi。



▲硬桃開花結籽。




▲狗尾仔草kap伊ê花。

2016年7月12日 星期二

20160704_阿公阿媽夏令營(第一工下午):

20160704_阿公阿媽夏令營(第一工下午):
兩个查某孫講歇熱bueh家己坐高鐵轉來kap阿公阿媽tuà五工,細漢--è Má-lîng-tsî講伊bueh計畫tsit 5ê功課表,阿公tsiâⁿ歡喜提出一寡想法建議hō͘ in參考,前一工計畫LINE--轉來,koh不止仔有內容。


早起著去員林看喙齒,所以約下晡ê班車,駛車去高鐵站,看in家己拖行李笑gī-gī落扶梯(hû-thui),真正有獨立大漢款。上車se̍h到八堡二圳圳岸邊停車,阿公阿媽導覽隨時開始,溪水kòng-kòng流「che是咱tsia水田淹水ê大溪,叫做八堡圳,he水濁濁真有肥分,lah-sap--ō͘!」
「面前水田稻仔已經割了,tshun稻稿頭,咱落來去行行--leh!」
『阿公,第一次踏在稻田上,好新奇的感覺。』
「著--ā!阿公細漢時,lóng mā tī田--裡sńg」「向東爿看to̍h是八卦山山脈。」
『阿公,這是什麼?』
阿媽:「這是肉螺仔,有人講做露螺。」阿公:「這是日本時代日本人引進入--內,伊êē使得食。」
『阿公,這裏樹木好多好涼快。』
,足涼--ē,來,hām阿媽徛做伙,阿公恁翕相。」
看,講話,可惜開始小可噴雨點仔,suah無聽著蟬ê叫聲,無看著鳥仔影,有較無夠氣。
轉來到厝,隨在in sńg,隨在in tshit-thô,因為時常轉--來,熟似liù-liù,阿公ê空課只等食飯飽kā in上台語課,主要是教lô-má-jī
iPad+appleTV+MacBookAir+FHL Taigi-Hakka IME+TV+音響:教 教育部台羅lô-má-jī
先簡單紹介學台語lô-má-jī聲韻ê概念:
△學華語(北京語)用ㄅㄆㄇㄈ,有聲母有韻母有聲調。
△學台語用p  ph m b,有聲母有韻母有聲調。
△台語聲母: pㄅ/ phㄆ/ mㄇ/ b帽/ tㄉ/ thㄊ/ nㄋ/ lㄌ/ kㄍ/ khㄎ/ ng雅/ g語/ tsㄗ/ tshㄘ/ sㄙ/ j字/ hㄏ。
△台語韻母: aㄚ/ eㄝ/ iㄧ/ oo o͘ㄛ/ uㄨ/ oㄜ。(單韻母)
△台語聲調:kun kún kùn kut kûn kún kūn ku̍t。
▲紲落去開喙綴老師唸,阿公唸一句,恁to̍h 綴阿公大聲唸一句:
p / t / k ;p / t / k;p / t / k;p / t / k;p / t / k 佮英語發音無仝。
咱tsit-má欲佇p / t / k 後壁加一字「h」做記號,表示送氣,to̍h是ph / th / kh,大聲綴阿公唸ph / th / kh;ph / th / kh;ph / th / kh;ph / th / kh;ph / th / kh。
lām-leh唸看覓:p / t / k,ph / th / kh;p / t / k,ph / th / kh;p / t / kph / th / kh,讚!唸了真tsán!
阿公問你:「h」按怎發音?「ㄏ」。著,「hㄏ」是聲母。
阿公koh問你:ph / th / kh」ê「h」啥乜意思?
『表示送氣』。「著!表示送氣。
阿公老師koh提紙khǹg tī喙口前示範p / t / k;ph / th / kh發音無仝ê結果。
閣再一擺發音練習to̍h結束,下課。
這是大漢--è Sió-gio̍k-á fb ê記載:
74日到彰化第一天
下高鐵就到八堡一圳看到一隻蝸牛, 阿公說是從日本引進過來的,走在到路上非常涼爽很舒服,晚上跟阿公學台語,學到很。多期待明天。
△高鐵彰化站(田中)落車。










▲八堡圳(二圳)看濁濁濁水溪水。










▲路邊看著一粒大露螺[蝸牛],阮講肉螺仔。










▲體驗割稻後踏稻草稻稿ê感覺。










▲八堡圳兩爿圳岸頂ê雨傘樹tng ām-ńg tng-súi。