按計畫今仔日頂晡bueh行八卦山脈田中鼓山寺到社頭清水巖ê步道，這是一條產業道路整理ê步道，因為佇無kài-kuân ê半山腰，規山坪kài-tsē相思樹，兩爿樹木ām-ńg，日頭光tshiō入bē熱，來tsia散步ê人真ka-ia̍h，路邊野花野草蟲豸鳥隻真濟，是讀冊囡仔ê活教材。行tsit-tsuā步道除了訓練囡仔跤力koh ē-tàng學著真濟物件。
1986年7月21日，韋恩風颱特別ùi濁水溪出海口掃入--來，濁水溪埔kap白波波ê平洋，無山nâ截，suah hō͘田中社頭ê八卦山相思仔林掃kah東倒西歪，風颱後有生理人bāu剉倒欉相思樹，siáⁿ知連無倒ê大箍大欉--ē mā順紲剉，為著剉tsiah-ê相思仔，to̍h開一條產業道路，尾仔tsiah整理做鐵馬路散步步道。
9點跤兜載來到山跤普興庄文武廟，kā車停tiàm tsia開始向北爿清水巖行tsiūⁿ山路，無崎無平起起落落，因為是禮拜二人較少，阮勻勻仔行，ná行ná交代囡仔斟酌看，感覺稀奇趣味--ē to̍h kā翕相，囡仔家己有手機仔，翕相無問題，問題是教in著ná翕ná聽阿公阿媽導覽。遊覽kap導覽無仝，遊覽是『走馬看花』影--leh 影--leh，導覽著斟酌詳細看koh-tio̍h問問題聽說明。
看著刺竹模，阿公講he是古早阿祖tuà竹管厝ê材料，看著較大葉ê麻竹欉，阿媽講he是縛肉粽ê粽箬仔，囡仔愛食阿媽縛--è米粽，感覺真有興趣。看著姑婆芋in知影名，m̄-koh m̄-bat看著tsiah大遍tsiah大葉閣有開花ê姑婆芋，趕緊kā說明講這叫做「植物群落」，in mā隨時翕相記錄。
繼續行繼續看，kuè-niau-á植物、開花結籽ê硬桃[月桃]，飛來飛去ê蝶仔、吊絲線ê蜘蛛kap蜘蛛網，石頭gih ê石頭岸，hō͘ in看kah心適koh趣味，其實阿公內心知知，講he台語是聽無2成，總--是有聽to̍h有記持，有看to̍h有濟少認bat，阿公阿媽阿孫感情互動tsiah是重點，有歡喜to̍h有收成，大漢孫koh ē-hiáu寫fb，同學看著定著真欣羡，未來台語ê學習保證有幫贊。
行來到一个坑門，tsiah知日頭赤iāⁿ-iāⁿ，趕緊翕一張相to̍h tiàm觀景台小歇睏，lim水食點心，行bueh點半鐘來到清水巖地界，看著無仝ê植物，狗尾仔草kap龍眼仔欉閣有生龍眼，原來龍眼仔是生做按呢生，來到生物館，無人紹介，家己簡單導覽，真濟筍龜(獨角仙)、杜定、蝶仔、蛾仔⋯真濟蟲豸標本，算是hō͘囡仔大開眼界，紲落去參觀清水巖古蹟，簡單說明宗教信仰ê風俗。
時間已經過晝，有朋友好心載阮去鼓山寺步道起點hit爿，to̍h-tī路邊飯店食晝，然後ùi起點行到文武廟，tú好完成tsi̍t-tsuā路程。
△步道樹木ām-ńg，散步好所在，因為有真濟外位來ê退休人客是散步常客，有人供體號做18%步道。
△看著奇巧，to̍h是愛翕相，阿媽tiàm邊--a說明。
△大漢--è認真翕相，細漢--èmā認真欣賞，肉粽箬仔----麻竹葉仔。
△tsia是山坑仔門，無樹蔭，天氣ná火燒埔。
△景觀台小歇睏，看--起來 m̄是kài-thiám。
▲這to̍h是龍眼仔欉，閣有生龍眼。
▲姑婆芋ê葉仔足大葩足súi。
▲狗尾仔草kap伊ê花。
沒有留言:
張貼留言