看相片回想人生_1969→1971_媽祖宮後稅厝二冬(一)：：

【看相片回想人生，是leh描寫Lah-jih ê記智，mā是leh紹介70外冬來ê生活一點一滴，講古兼敨放心思。】

看相片回想人生_1969→1971_媽祖宮後稅厝二冬(一)：
▲媽祖宮後「國華西裝社」：
「成家」是查埔人人生一大坎站，「立業」是紲落去又閣一大坎站。想著家己一kó͘月tsiah趁千thóng箍，莫怪斯當時食頭路ê女性無愛嫁hō͘散教員仔。師範出業做老師是真好名，娶老師娶食公家頭路是較少數，娶做裁縫--ē、電頭毛--e、刺膨紗--e算是真好ê對象，娶做穡--è、剃頭--ē m̄是有，重要是ē-hiáu tàu趁錢，m̄-tsiah it-tio̍h牽--e有tsit手趁錢功夫，人範koh生做高尚柔性，Taⁿ已經結婚都過了四kó͘月，雖罔兄弟猶原是一家人，總--是牽--e有tsit手做西裝ê功夫，應該著發揮加減趁錢鬥相添。
參詳決定家己開業做西服做生理做副業，大兄建議，世華西裝社徛店tī車頭hit爿，咱號名國華西裝社to̍h tiàm媽祖宮後稅店，距離較遠khah-bē相搶人客khah-bē誤會拍歹感情。契約1年1年拍，厝稅一kó͘月450箍，是我月給三分之一，店面無夠5坪，後壁一間小可ē-tàng轉踅房間，煮食灶跤、浴間、便所kap厝主合leh用，厝主好鬥陣，勉強歡喜過日。
買1座半舊落仔掛玻璃見本櫥，叫師傅簡單釘一隻布床，厝--裡攑幾隻椅仔椅頭仔kap細隻食飯桌，買幾桶油漆招朋友鬥油油漆漆--leh，佈置差不多，廣告社簡單看板「國華西裝社」mā掛四是，利用週末歇睏日翁某相tshuā去彰化布市選一寡時行男裝布料，隔轉日貨to̍h寄到位，簡單排排疊疊--leh都也有sîng一間裁縫店店面。
結婚開了一筆錢，雖罔聘金回hō͘大兄，這擺開西裝社又閣著大兄發落本錢，大兄提一張1萬箍支票hō͘我兌現金，彰化布行hak布料因為牽--e有熟免現金，hak東hak西2萬是有夠額，通書掀掀--leh，揣一日清氣日仔to̍h kā「開張大吉(khai-tiang tāi-kiat)」，丈人兜後頭mā tshuân來碗碟仔、菜櫥仔講是勁灶(kīng-tsàu)，suah hō͘我感覺bē-su已經兄弟分開食。
連炮仔pìn-piàng吼，田中街仔媽祖宮後新開一間「國華西裝社」，立業tit-bueh拍基礎，歡頭喜面接待捧場人客，內心卻是沈重有「一人一家代」ê壓力，阿兄敢會？家己臭心想，若無生理是bueh按怎支付厝稅開支？「頭 洗--落去，無剃敢ē-soah-tit？」將近「三十而立」ê歲數，猶閣煩惱東煩惱西無bueh笑死人--kong？