2016年10月23日 星期日

看相片回想人生_1971→1977_中州路南北巷稅厝六冬(十):

【看相片回想人生,是leh描寫Lah-jih ê記智,mā是leh紹介70外冬來ê生活一點一滴,講古兼敨放心思。】

看相片回想人生_1971→1977_中州路南北巷稅厝六冬(十):



▲1965年做兵前參加大學聯考考無tiâu,koh bē-giàn去讀師專,to̍h按呢iân-tshiân到1974年,tsiah m̄情m̄願去讀暑期部空中教學班,兩年4學期ê課程安排下班後看電視上課,另外安排兩个歇熱轉去學校上課。
每學期開學 著去學校選課買冊,學期尾tsiah轉來學校考試,別人按怎讀咱m̄知,咱是讀無幾節課to̍h無耐性koh讀,尾仔連教科書mā無買,每學期註冊完to̍h是聽候考試。
來空中班讀冊ê老師雖罔是學校現任教師,既然是bueh來讀冊to̍h是學生,學生驚考試是無解ê定律,考試前大多數老師lóng緊張萬分,「平時m̄認真,臨時tsiah leh o͘-mí-tō͘-hu̍t!」考試中,靜觀厝邊隔壁,有人tshi-tshi-tshu̍h-tshu̍h,有人想bueh探頭,監考老師是罔行罔巡,有khuàiⁿ ná無khuàiⁿ,mài siuⁿ過m̄是款to̍h好。
咱雖罔無準備,因為考題是100條選擇題,憑常識判斷,無30分鐘to̍h交卷。等待成績公佈--出來,全部及格平均7-80分,笑詼--e是第二學期考試,坐後壁彼位老師竟然要求「mài hiah緊交卷--lah!」
歇熱轉去學校上課有分組,選音樂組著彈琴、唱歌鑑定,彈琴咱頇慢,歌聲算bē-bái,to̍h按呢kap 9个男生 40幾个女生合做一班上課,大部份是師範學校ê學長,年齡精差無幾歲,閣有仝款趣味,hit兩个暑假田中、台中來來去去,有時坐車有時騎o͘-tó͘-bái,都也心適m̄知ià-siān。
學期尾tn̄g-tio̍h考試,上驚驚填充題kap問答題,雖罔老師有暗示題目,總--是bē-hiáu to̍h是bē-hiáu,bueh按怎提分數?只有違背一向習慣ê良心,抄paper作弊(tsok-pè),心肝íⁿ-á phi̍h-pho̍k-tsháiⁿ。
音樂組考試kài簡單,老師指定2首歌hō͘咱揀,咱選徐志摩作詞彼首『偶然:我是天空裏的一片雲,偶爾投影在你的波心,你不必訝異,更無須歡喜,在轉瞬間消滅了蹤影。你我相逢在黑夜的海上,你有你的,我有我的方向;你記的也好,最好你忘掉⋯』認真唱到tsia,竟然真正『忘掉』bē記得尾仔結束hit段,有夠厭氣,目睭lió著老師已經96 tit-bueh tsu̍t--落去,結果6改2,92分,噗仔聲koh bē少。
▲1976年2月29日台中師專暑期部空中教學二年制國校師資科音樂組出業,提著tsit張畢業證書,感覺ná 像桌頂ni柑。


▲緣聚緣散,m̄知各位老同學tsit-mái好--bò͘?

▲1976年3月1日生效,核薪通知書:台中師專暑期部空中教學班畢業,核定暫支薪額拾陸級叁叁零元。
薪水都已經領10外年,教師登記mā登記--à,為啥乜核薪猶停tī「核定暫支薪額」?


























▲1975年10月後生出世。
▲1976年過年初二轉去寶斗阿媽兜。



▲亦哲四kó͘月收瀾,頷頸仔掛鹹光餅。

▲Kap外媽翕相。增加1个後生,阿媽特別歡喜。



▲Kap厝邊囡仔伴翕相。




▲1976年11月23日亦哲度晬閣1-kó͘月。




2016年10月20日 星期四

看相片回想人生_1971→1977_中州路南北巷稅厝六冬(九):

【看相片回想人生,是leh描寫Lah-jih ê記智,mā是leh紹介70外冬來ê生活一點一滴,講古兼敨放心思。】

看相片回想人生_1971→1977_中州路南北巷稅厝六冬(九):



▲Tn̄g-tio̍h貴人:
啥乜是貴人,親像tn̄g-tio̍h歹厝主ê刺激hō͘你閣較phah拚,親像有人提醒有人tit-bueh倒店,hō͘你趕緊kā錢討倒轉來,這lóng是咱ê貴人。一生貴人一大堆,有親人、有朋友,有幫贊、有橫逆,有熟似、有生份,只要對我有正面幫助鼓勵抑是負面刺激提醒,lóng是貴人,所以--à,做人著感恩。
庄腳囡仔閣是屘仔囝,萬項代誌有序大兄哥發落便便,大漢suah m̄-bat理財方法,kan-na知影郵局儉錢較穩,bē hông倒--去。
斯當時三潭國小屬中小型庄腳學校,17-8班 學生無tsiūⁿ千个,同事20-thóng,無複雜bē稀微,處處是人情味,下課辦公室phò-tāu ha茶tām-sám,上課相招便所慢--5分鐘無人ē加講話,總--是認真教冊盡本份,無hit-lō時間限制,都也消遙自在。
斯當時厝--裡兼副業有趁錢ê老師幾若个,教導主任知影我kan-na ē-hiáu郵局儲蓄利息無濟,to̍h好意教我ē使得寄伊hia hō͘伊轉踅,利息比照市價算5分。
「m̄-koh想bueh買厝時,敢ē-tàng隨時還我錢?」
「我寫本票hō͘--你,無押日期,保證ē兌現(thùi-hiàn),不過若bueh sak hō͘別人,一定事先kā我講,1禮拜前kā我講,hō͘我有準備。」
大約1年來,寄伊5萬kap 7萬,逐kó͘月有利息,tsiâⁿ放心。
有一工,牽--e去頭毛店セット[頭髮造型],咱都知,頭毛店是放送頭所在,頭家娘kā牽--e托頭,「最近有3主tit-bueh喝倒,恁頭--ē ê學校主任mā是嫌疑一个。」
Ná信ná m̄信,天光日上班看教導主任也無koh樣,m̄-koh人講「人喙毒毒」,定著有khi-khiau。hit-tsūn聽某喙已經訂一間11坪地兩樓販厝,人bueh收定金,to̍h照約束提早1禮拜kā主任講,5萬箍定金兌現無問題,經過1-kó͘月,人bueh閣來收第二期款,tsit擺刁工無kā主任講,先kā支票押日期,押1禮拜後ê日期,天光日tsiah kā主任報備,心內想,按呢to̍h無違背約束,對主任無啥乜歹勢;主任敢會為著少少7萬箍,to̍h提早喝倒?
好佳哉,1-kó͘月後,教導主任真正喝倒,同事為著債務leh開會討論,我suah好運一屑仔都無牽礙。
o͘-mí-tō͘-hu̍t!好佳哉,tsit 12萬箍若真正hō͘人倒--去,買厝ê向望m̄知ē變做啥乜款?
▲1976年兼課務註冊組長。


▲彰化縣政府聘書:工作科輔導員。
進前科學玩具輔導已經結束,紲落去轉做低年級「工作」輔導員。

▲輔導工作科教學努力效果良好,嘉獎1次。
▲鼓勵學區民眾參加64年增額立委選舉投票成績優異,記功1次。
記功是頭一擺,kan-na交代學生囡仔轉去厝--裡kā厝內ê人宣傳著去選舉投票,因為國民黨大贏,tsiah有「記功」獎勵,可見斯當時是偌仔呢忠黨愛國。
▲另外安排中興新村、省議會、新萬仁製藥廠參觀tshit-thô,一行幾若名,坐バス(公共汽車),這是難得ê機會,好佳哉有查某孫仔tàu-tshuā囡仔。這擺翕相無惜本錢,翕彩色--è,可惜囥久suah褪色。









2016年10月18日 星期二

看相片回想人生_1971→1977_中州路南北巷稅厝六冬(八):

【看相片回想人生,是leh描寫Lah-jih ê記智,mā是leh紹介70外冬來ê生活一點一滴,講古兼敨放心思。】

看相片回想人生_1971→1977_中州路南北巷稅厝六冬(八):
▲Tn̄g-tio̍h歹厝主,tam-tio̍h暗淡人生滋味,認bat惜錢無惜情ê人性。
南北巷稅厝3年後,厝主講bueh kā厝賣掉,厝跤是第一優先,牽--e講bueh借錢來買,我無同意,因為粒積無夠額「一丈差九尺」,牽--e講「極加bē過關kā厝koh賣hō͘別人,驚啥乜?」終其尾猶是hō͘別人買--去。
買主防我反悔,要求我寫一份無條件放棄書,koh掛保證ē繼續稅我做生理。新ê厝稅起100箍,算是合理,to̍h按呢繼續營業,1年契約liâm-mī過,新厝主要求起厝稅,800起1600,有夠tshik-ò͘,一睏起重倍,tshiâu-tshi̍k一禮拜無結果,堅持著愛1600 m̄願減,閣講咱是好朋友好同事,實在hō͘人心頭酸兼氣惱,輕輕兩tsáiⁿ指頭仔氣氣tah對ミシン枋「pia̋k」一聲,「好,mài-koh講,生理mài做,搬還--你。」
天光日伊叫一位好朋友做說客做公親,向望趕緊代書簽約,也無hō͘公親做人情減少1-sián 5-lî,朋友自然鼻仔摸--leh m̄敢閣講,尾仔猶是厝主家己koh來會,勉強減100完成簽約。
Tn̄g-tio̍h tsit款hîng-gi̍k死無人ê厝主,怨嘆稅厝徛看人目色ê悲哀,想講kui-khì mài做,khah-bē gi̍k kah起破病,牽--e安慰講「koh吞忍一站--à,叫你開西藥房khah-ē趁錢,你都m̄肯,只好勻勻仔來,儉若有夠額家己蓄一--間,to̍h免按呢hông tsiau-that。」
「聽某嘴,大富貴。」牽--e實在較有拍算,自按呢較苦仔稅--落去。
好朋友好同事?為著厝稅起價因端,話屎一大堆四界颺颺飛,好同事tī in學校投--人講「蕭老師kā伊頓椅頓桌。」in某kā人宣傳講「蕭老師是好朋友,tī in-tau飯碗gè kah bueh ui--去。」意思是蕭老師tsiâⁿ無理,忘恩背義。看著鬼,tī我店內輕輕2聲to̍h是無理kā伊頓椅頓桌?幾年前同事期間,bat和另外同事tī in-tau食過兩擺便飯,to̍h pìⁿ-tsiâⁿ飯碗gè kah bueh ui--去?實在有夠譀古有夠放送頭,按呢ê好朋友,竟然惜錢無惜情。
1975歇熱是siāng-kài鬧熱ê日子,大兄查某囝阿錦,三兄查某囝素梅kap換帖兄弟ê小妹阿娟,攏來bueh kap牽--e學技藝,加減khioh寡做衫補紩ê功夫,一間店真正鬧熱滾滾。
△利用公休日做伙去松柏坑(tshîng-peh-kheⁿ)tshit-thô野餐。


△3个古錐ê查某囝,看查某囝歡喜平安大漢,是做父母上大ê安慰。老母是西裝師傅,家己設計ê囡仔衫to̍h是kap人無仝。




▲學校上班:兼職研究課長。

▲學校上班:兼職課務註冊組長。

▲縣政府縣長吳榮興聘書:工作科輔導員。
低年級ê美術勞作課是工作科,指導低年級一寡囡仔tshit-thô物ê做法,老師學kah真趣味。

▲實在bē記得有做過tsit个職務。

▲鼓勵升學成績優良,嘉獎1次。


























▲1975年10月亦哲出世慈蓉讀慈興幼稚園

2016年10月17日 星期一

看相片回想人生_1971→1977_中州路南北巷稅厝六冬(七):

【看相片回想人生,是leh描寫Lah-jih ê記智,mā是leh紹介70外冬來ê生活一點一滴,講古兼敨放心思。】

看相片回想人生_1971→1977_中州路南北巷稅厝六冬(七):
 ▲1974年正月初二和牽--e轉去寶斗後頭厝,tī大舅仔兜翕tsit張全家福。
 ▲過年暝牽--e猶leh拚暝工,新正年頭需要補眠睏kah飽,我kap囡仔轉去崁頂行春。牽--e先kā三个查某囝打扮好勢,tsiah去o͘ⁿ-o͘ⁿ睏,我騎tsit台BS o͘-tó͘-bái載三个查某囝,轉去崁頂庄行行se̍h-se̍h--leh,hō͘囡仔有過年ê感覺,tī阿伯兜有四秀仔thang食,閣有紅包,這是囡仔愛過年上讚ê記智。
▲講著tsit台BRIDGESTONE o͘-tó͘-bái,又是話頭長,1970年代,老師騎o͘-tó͘-bái上班已經tsiâⁿ做一款時行,為著綴流行kap出入方便,1冬前kā人買1台二手貨,mā是貴蔘蔘,因為時常熄火bē順,大兄後生輝虎看bē做得,to̍h補貼萬外箍叫我換新車,開2萬thóng,輝虎驚我m̄接受,講好聽話,講bueh kap我公家用,其實我知知,伊kap大兄tiàm阿里山做穡,ná有機會騎tsit台o͘-tó͘-bái?
有o͘-tó͘-bái代替鐵馬,m̄-nā速度緊速,載人mā加真方便,一擺ē-tàng載幾若个。hit年,丈人兜做冬尾戲,一家5个人,油箱坐1个,牽--e āiⁿ 1个坐後壁,牽--e kap我中間koh seh 1个,食飽後已經暗時8-9點,一路平安寶斗轉來田中(Chhân-tiong),囡仔已經睏ka-tsuē。
 ▲Tsia是崁頂役會前ê圓環,後壁刺竹模猶tsiâⁿ大模。
▲古早是役會,tsit-mái改建做活動中心,suah祀1仙尪仔。
▲1977年寫ê自傳:出身農家,不諳農事,兄弟五人,排行老么,少失母愛,未及成人,又死父親,幸賴兄嫂撫育教導,方得成人,受完師範教育,可謂集家中寵愛集於一身⋯


▲197?年,台灣省國民小學教師證書。以後to̍h m̄-bat閣辦登記。



▲縣政府令,嘉獎1次:1974年協助國教研習會辦理兒童科學玩具展覽工作認真努力。


▲1974年縣政府獎狀。

2016年10月13日 星期四

看相片回想人生_1971→1977_中州路南北巷稅厝六冬(六):

【看相片回想人生,是leh描寫Lah-jih ê記智,mā是leh紹介70外冬來ê生活一點一滴,講古兼敨放心思。】

看相片回想人生_1971→1977_中州路南北巷稅厝六冬(六):
▲記智中,國民學校時代學校內to̍h有「福利社」,ná像有leh賣一寡簿仔、鉛筆、刀仔、攄仔kap一寡喙食物四秀仔,下課時間to̍h鬧熱滾滾,bat kap同學入去幾擺,hui-hui看看--leh to̍h隨出--來,因為橐袋仔袋磅子無半sián。
1962年出來教冊以後,學校仝款有「福利社」,仝款囡仔喙食物、鉛筆、刀仔,不過喙食物加真濟,有he生理人專門leh送貨。生理ka-ia̍h tī歇睏10分鐘20分鐘,親像一陣風,人濟消費to̍h驚人,每年度結賬穩趁無了。
「福利社」有趁錢,按怎處理,由福利社委員會處理,補助學校開銷,建設學校設施,辦摸彩抽獎鼓勵學生,全校老師食紅分錢抑是辦遊覽⋯。
▲1973年旅遊:
自從開店了後有4冬久,無閒穡頭,囡仔1个1个來報到,ná像m̄-bat翁某鬥陣出門旅行。1973 hit年由學校福利社補助決定春假南部遊覽,翁某tsiah有機會出門tshit-thô。因為無thang全額補助,報名老師kan-na一半,附帶家屬大人囡仔一行將近20名,m̄敢倩遊覽車,先坐火車到高雄,tsiah-tī高雄倩1台中型遊覽車,載阮去大貝湖(tuā-pī-ô͘)、墾丁公園、鵝鑾鼻(gô-luân-phīⁿ),1暝2工遊覽。
逸琳、如芳猶細漢,交hō͘大嫂tshuā,慈蓉已經ē-hiáu家己行,tsiah綴阮tshit-thô。已經年久月深,bē記得按怎tshit-thô,bē記得按怎tuà旅社,kan-na ē記得大人、囡仔攏行kah足趣味,耍kah足歡喜。好佳哉有相機留落來影像,tsiah ē-tàng數念少年時代ê歡喜記智。
△墾丁公園「一線天」。
























墾丁公園內。

墾丁公園第一峽,珊瑚礁(sān-ô͘-tsiau)造成。


墾丁公園大門入喙。

墾丁公園大門對面海邊,耍海水,khioh螺仔殼,囡仔耍kah足歡喜,記智tsiâⁿ深。
▲難得出門tshit-thô,西裝打扮koh khan烏仁目鏡,是tsiâⁿ紳士ê時行。

▲Tī大貝湖。

Tī大貝湖水族館,有入去內面參觀。
▲Tī鵝鑾鼻燈塔?

▲bē記得所在?